اسلام آباد (تھرسڈے ٹائمز) — وفاقی حکومت کی جانب سے آئندہ مالی سال کا بجٹ پیش کیے جانے کے بعد پاکستان سٹاک مارکیٹ میں زبردست تیزی، ہنڈرڈ انڈیکس میں 76 ہزار کی نفسیاتی حد بھی عبور ہو گئی۔
آج پاکستان سٹاک مارکیٹ میں زبردست اضافہ دیکھنے میں آیا ہے، گزشتہ روز 72 ہزار 797 پوائنٹس پر بند ہونے والی سٹاک مارکیٹ میں آج کاروبار کے اختتام تک ہنڈرڈ انڈیکس 76 ہزار 208 پوائنٹس تک پہنچ گیا، مجموعی طور پر ہنڈرڈ انڈیکس میں اب تک 3 ہزار 410 پوائنٹس (چار اعشاریہ 69 فیصد) کا نمایاں اضافہ ہوا ہے۔
کاروباری ہفتے کے چوتھے روز یہ نمایاں اضافہ گزشتہ روز وفاقی حکومت کی جانب سے پیش کیے گئے بجٹ کے بعد آیا ہے جو کہ سرمایہ کاروں کے اعتماد میں اضافہ کو واضح کرتا ہے۔
تجارتی حجم کو دیکھا جائے تو 34 کروڑ 18 لاکھ 62 ہزار 137 حصص کا تبادلہ ہوا ہے جبکہ تجارتی مالیت 21 ارب 5 کروڑ 88 لاکھ 92 ہزار 177 روپے رہی ہے۔ تجزیہ کاروں کا کہنا ہے کہ بجٹ میں بیان کیے گئے اقدامات اور معاشی اشارے سٹاک مارکیٹ میں اس مثبت ردعمل کی وجوہات ہیں جس سے مستقبل میں مزید ترقی کے امکانات کی امید پیدا ہوئی ہے۔
مزید اپ ڈیٹس کیلئے ہمارے ساتھ رہیں۔
