اسلام آباد (تھرسڈے ٹائمز) — امریکہ کی جانب سے بلوچستان کے ضلع کچھی میں جعفر ایکسپریس ٹرین پر دہشت گرد حملے اور مسافروں کو یرغمال بنائے جانے کے واقعے کی شدید مذمت۔ اس حملے کی ذمہ داری بلوچ لبریشن آرمی (بی ایل اے) نے قبول کی ہے، جسے امریکہ نے خصوصی طور پر عالمی دہشت گرد تنظیم قرار دے رکھا ہے۔
امریکی سفارت خانے کی جانب سے جاری بیان میں کہا گیا ہے کہ امریکہ اس المناک واقعے کے متاثرین، ان کے اہل خانہ اور اس سے متاثر ہونے والے تمام افراد کے ساتھ دلی ہمدردی اور تعزیت کا اظہار کرتا ہے۔ بیان میں واضح طور پر کہا گیا کہ پاکستانی عوام کو حق حاصل ہے کہ وہ تشدد اور خوف کے بغیر محفوظ اور پرامن زندگی بسر کریں۔
We strongly condemn the attack on the Jaffar Express train, and the hostage-taking of passengers in Kacchi, Balochistan, claimed by the Baloch Liberation Army, a U.S.-Specially Designated Global Terrorist group. We extend our deepest sympathies and condolences to the victims,…
— U.S. Embassy Islamabad (@usembislamabad) March 12, 2025
واقعہ ضلع کچھی کے قریب اس وقت پیش آیا جب مسلح دہشت گردوں نے جعفر ایکسپریس ٹرین کو روک کر متعدد مسافروں کو یرغمال بنا لیا۔ پاکستانی سیکیورٹی فورسز کی جانب سے فوری کارروائی کے باوجود اس واقعے میں کئی افراد کے جانی نقصان کی اطلاعات موصول ہوئی ہیں، جس سے علاقے میں خوف و ہراس پھیل گیا ہے۔
یہ حملہ بلوچستان میں جاری دہشت گردی اور علیحدگی پسندانہ کارروائیوں کے تسلسل کا حصہ ہے، جو صوبے میں سلامتی کے شدید مسائل کی جانب اشارہ کرتا ہے۔ امریکہ نے اپنے بیان میں دہشت گردی کے خلاف پاکستان کے ساتھ تعاون کو مزید مستحکم کرنے اور دہشت گرد گروہوں کی بیخ کنی کے لیے مشترکہ کوششوں کی یقین دہانی بھی کرائی ہے۔
پاکستانی حکام کی جانب سے اس واقعے کی تحقیقات جاری ہیں جبکہ بین الاقوامی سطح پر اس دہشت گرد کارروائی کی شدید مذمت کی جا رہی ہے۔ امریکہ کی جانب سے اس حملے کی مذمت سے ظاہر ہوتا ہے کہ عالمی برادری دہشت گردی کے خلاف پاکستان کی کوششوں کی مسلسل حمایت جاری رکھے گی۔∎
