میونخ (تھرسڈے ٹائمز) — پاک فوج کے سربراہ اور چیف آف ڈیفنس اسٹاف، فیلڈ مارشل سید عاصم منیر نے 12 سے 14 فروری تک جرمنی میں ہونیوالی 62 ویں میونخ سکیورٹی کانفرنس میں شرکت کی۔
آئی ایس پی آر کے مطابق دورے کے دوران COAS اور CDF نے متعدد عالمی شخصیات سے ملاقاتیں کیں، جن میں امریکی وزیرِ خارجہ مارکو روبیو بھی شامل تھے۔ ملاقات میں باہمی دلچسپی کے امور پر گفتگو ہوئی، جس میں عالمی و علاقائی سلامتی کی صورتحال اور انسدادِ دہشت گردی میں تعاون نمایاں رہا۔
جرمن حکام کے ساتھ ملاقاتوں میں فیلڈ مارشل عاصم منیر نے جرمنی کے وفاقی وزیرِ داخلہ الیگزینڈر ڈوبرنٹ، وفاقی چانسلر کے خارجہ و سلامتی پالیسی کے مشیر گُنٹر ساؤٹر، اور جرمن مسلح افواج کے چیف آف ڈیفنس جنرل کارسٹن بریور سے ملاقات کی۔ آئی ایس پی آر کے مطابق ان مذاکرات میں موجودہ دور کے سلامتی چیلنجز، دوطرفہ دفاعی تعاون، اور دوطرفہ و کثیرالجہتی مکالمے کے ذریعے عالمی امن و سلامتی کے فروغ کی اہمیت پر توجہ مرکوز رہی۔
آئی ایس پی آر نے مزید کہا کہ فیلڈ مارشل عاصم منیر نے برازیل کی مسلح افواج کے چیف آف جوائنٹ اسٹاف ایڈمرل ریناٹو روڈرگز دی اگویار فریرے کے ساتھ بھی مفید ملاقات کی، جس میں دوطرفہ عسکری تعاون کے مختلف پہلوؤں اور امکانات پر تبادلہ خیال کیا گیا۔
اسی دوران لبنانی مسلح افواج کے کمانڈر جنرل رودولف ہیکل نے بھی فیلڈ مارشل عاصم منیر سے ملاقات کی، جس میں بدلتی ہوئی علاقائی و عالمی سلامتی کی صورتحال اور دوطرفہ دفاعی تعاون کو مزید مضبوط بنانے کے اقدامات پر گفتگو ہوئی۔
