اسلام آباد (تھرسڈے ٹائمز) — فوجی عدالتوں (ملٹری کورٹس) کی جانب سے سانحہ 9 مئی میں ملوث 25 مجرموں کو 10 سال قید بامشقت تک کی سزائیں سنا دی گئیں۔
نو مئی کے پُرتشدد واقعات پاکستان کی تاریخ میں سیاہ باب رکھتے ہیں
پاک فوج کے شعبہ تعلقاتِ عامہ (آئی ایس پی آر) کی جانب سے جاری کیے گئے اعلامیہ کے مطابق 9 مئی 2023 کو قوم نے سیاسی طور پر بھڑکائے گئے اشتعال انگیز تشدد اور جلاؤ گھیراؤ کے افسوسناک واقعات دیکھے، نو مئی کے پرتشدد واقعات پاکستان کی تاریخ میں سیاہ باب رکھتے ہیں، مجرمان کے خلاف ناقابلِ تردید شواہد اکٹھے کیے گئے ہیں، اس یومِ سیاہ (نو مئی) کے بعد تمام شواہد اور واقعات کی باریک بینی سے تفتیش کی گئی.
سزاؤں کا فیصلہ قوم کیلئے انصاف کی فراہمی میں ایک اہم سنگِ میل ہے
انٹر سروسز پبلک ریلیشنز (آئی ایس پی آر) کے مطابق فیلڈ جنرل کورٹ مارشل نے پہلے مرحلے میں سانحہ 9 مئی میں ملوث 25 ملزمان کو سزائیں سنائی ہیں، سزاؤں کا فیصلہ قوم کیلئے انصاف کی فراہمی میں ایک اہم سنگِ میل ہے، نو مئی کی سزائیں اُن تمام لوگوں کیلئے ایک واضح پیغام ہیں جو چند مفاد پرستوں کے ہاتھوں استحصال کا شکار ہوتے ہیں، نو مئی کے واقعات واضح طور پر زور دیتے ہیں کہ کسی کو بھی سیاسی دہشتگردی کے ذریعہ اپنی مرضی دوسروں پر مسلط کرنے کی اجازت نہیں دی جا سکتی۔
سیاسی پروپیگنڈا اور زہریلے جھوٹ کا شکار بننے والے لوگوں کیلئے یہ سزائیں تنبیہ ہیں
آئی ایس پی آر کی جانب سے جاری اعلامیہ میں کہا گیا ہے کہ یہ سزائیں تمام شواہد کی جانچ پڑتال اور مناسب قانونی کارروائی کی تکمیل کے بعد سنائی گئی ہیں، سیاسی پروپیگنڈا اور زہریلے جھوٹ کا شکار بننے والے لوگوں کیلئے یہ سزائیں تنبیہہ ہیں کہ مستقبل میں کبھی قانون کو ہاتھ میں نہ لیں۔ متعدد ملزمان کے خلاف انسدادِ دہشتگردی کی مختلف عدالتوں میں بھی مقدمات زیرِ سماعت ہیں جبکہ دیگر ملزمان کی سزاؤں کا اعلان بھی ان کے قانونی عمل مکمل کرتے ہی کیا جا رہا ہے۔
مکمل انصاف اُس وقت ہو گا جب ماسٹر مائنڈ اور منصوبہ سازوں کو سزا ملے گی
پاک فوج کے شعبہ تعلقاتِ عامہ کے مطابق صحیح معنوں میں مکمل انصاف اس وقت ہو گا جب 9 مئی کے ماسٹر مائنڈ اور منصوبہ سازوں کو آئین و قانون کے مطابق سزا مل جائے گی، ریاست پاکستان 9 مئی کے واقعات میں مکمل انصاف مہیا کر کے ریاست کی عملداری کو یقینی بنائے گی، سانحہ 9 مئی کے مقدمہ میں انصاف فراہم کر کے تشدد کی بنیاد پر کی جانے والی گمراہ اور تباہ کن سیاست کو دفن کیا جائے گا۔
نفرت اور جھوٹ پر مبنی سیاسی بیانیے کی بنیاد پر مسلح افواج کی تنصیبات پر منظم حملے کیے گئے
آئی ایس پی آر کے اعلامیہ میں کہا گیا ہے کہ 9 مئی کو پر کیے جانا والا انصاف نفرت، تقسیم اور بےبنیاد پروپیگنڈا کی نفی کرتا ہے، آئین اور قانون کے مطابق تمام سزا یافتہ مجرموں کے پاس اپیل اور دیگر قانونی چارہ جوئی کا حق ہے، نفرت اور جھوٹ پر مبنی ایک پہلے سے چلائے گئے سیاسی بیانیے کی بنیاد پر مسلح افواج کی تنصیبات بشمول شہداء کی یادگاروں پر منظم حملے کیے گئے اور اُن کی بےحرمتی کی گئی، یہ پُرتشدد واقعات پوری قوم کیلئے ایک شدید صدمہ ہیں۔
فوجی عدالتوں سے سزا پانے والے 25 مجرمان کی تفصیلات
جناح ہاؤس لاہور
جناح ہاؤس حملے میں ملوث جان محمد خان ولد طور خان، محمد عمران محبوب ولد محبوب احمد، عبدالہادی ولد عبدالقیوم، علی شان ولد نور محمد، علی افتخار ولد افتخار احمد، ضیاء الرحمٰن ولد اعظم خورشید اور داؤد خان ولد شاد خان کو دس دس سال قید بامشقت کی سزائیں سنائی گئی ہیں۔
جناح ہاؤس حملے میں ملوث فہیم حیدر ولد فاروق حیدر، محمد حاشر خان ولد طاہر بشیر کو چھ چھ سال قید بامشقت کی سزائیں سنائی گئی ہیں۔
جناح ہاؤس حملے میں ملوث محمد عاشق خان ولد نصیب خان کو 4 سال قید بامشقت کی سزا سنائی گئی ہے۔
جناح ہاؤس حملے میں ملوث محمد بلاول ولد منظور حسین کو 2 سال قید بامشقت کی سزا سنائی گئی۔
پنجاب رجمنٹل سینٹر مردان
پنجاب رجمنٹل سینٹر مردان حملے میں ملوث رحمت اللّٰہ ولد منجور خان اور عدنان احمد ولد شیر محمد کو دس دس سال قید بامشقت کی سزا سنائی گئی ہے۔
پنجاب رجمنٹل سینٹر مردان حملے میں ملوث یاسر نواز ولد امیر نواز خان اور سیِعد عالم ولد معاذ اللّٰہ خان کو دو دو سال قید بامشقت کی سزائیں سنائی گئی ہیں۔
جی ایچ کیو راولپنڈی
جی ایچ کیو (جنرل ہیڈ کوارٹرز راولپنڈی) حملے میں ملوث راجا محمد احسان ولد راجا محمد مقصود، عمر فاروق ولد محمد صابر کو دس دس سال قید بامشقت کی سزائیں سنائی گئی ہیں۔
پی اے ایف بیس میانوالی
پی اے ایف بیس میانوالی حملے میں ملوث انور خان ولد محمد خان اور بابر جمال ولد محمد اجمل خان کو دس دس سال قید بامشقت کی سزائیں سنائی گئیں۔
بنوں کینٹ
بنوں کینٹ حملے میں ملوث محمد آفاق خان ولد ایم اشفاق خان کو 9 سال قید بامشقت کی سزا سنائی گئی ہے۔
چکدرہ قلعہ
چکدرہ قلعہ حملے میں ملوث داؤد خان ولد امیر زیب کو 7 سال قید بامشقت کی سزا سنائی گئی ہے۔
ملتان کینٹ چیک پوسٹ
ملتان کینٹ چیک پوسٹ حملے میں ملوث زاہد خان ولد محمد خان کو 4 سال قید بامشقت کی سزا سنائی گئی ہے۔
ملتان کینٹ چیک پوسٹ حملے میں ملوث خرم شہزاد ولد لیاقت علی کو 3 سال قید بامشقت کی سزا سنائی گئی ہے۔
آئی ایس آئی آفس فیصل آباد
آئی ایس آئی آفس فیصل آباد حملے میں ملوث لئیق احمد ولد منظور احمد کو 2 سال قید بامشقت کی سزا سنائی گئی ہے۔
