نیو گوادر انٹرنیشنل ایئرپورٹ پر کراچی سے قومی ایئر لائن کی پہلی پرواز پی کے 503 نے لینڈ کرگئی۔ پرواز کی آمد پر روایتی واٹر سلیوٹ دیا گیا، جس نے تقریب کو یادگار بنا دیا۔ ایئرپورٹ پر وفاقی وزیر خواجہ آصف، گورنر بلوچستان جعفر خان مندوخیل، وزیرِ اعلیٰ بلوچستان سرفراز بگٹی، اور چین کے اہم نمائندوں نے مسافروں کا شاندار استقبال کیا۔
نیو گوادر انٹرنیشنل ایئرپورٹ مکمل طور پر فعال؛
نئے ایئرپورٹ پر پہنچنے والی پہلی پرواز کو واٹرکینن سے سلامی دی گئی pic.twitter.com/3xBqOTijfo— The Thursday Times (@thursday_times) January 20, 2025
فلائٹ شیڈول
کراچی سے روانہ ہونے والی پرواز میں 45 منٹ کی تاخیر ہوئی، جو صبح 9:15 کے بجائے 10:00 بجے روانہ ہوئی اور 11:11 بجے گوادر پہنچی۔ قومی ایئر لائن نے اس پرواز کے لیے اے ٹی آر طیارہ استعمال کیا۔
گوادر ایئرپورٹ: پاکستان کا سب سے بڑا ایئرپورٹ
نیو گوادر انٹرنیشنل ایئرپورٹ پاکستان کا سب سے بڑا ایئرپورٹ ہے، جو 4300 ایکڑ پر محیط ہے اور گوادر شہر سے 26 کلومیٹر دور گورنڈانی کے مقام پر واقع ہے۔
- رن وے کی خصوصیات
ایئرپورٹ کا واحد رن وے 3658 میٹر طویل اور 75 میٹر چوڑا ہے، جو ایئر بس اے 380 اور بوئنگ 747 جیسے بڑے طیاروں کے لینڈ کرنے کی صلاحیت رکھتا ہے۔ - تعمیراتی لاگت
تقریباً 50 ارب روپے کی لاگت سے مکمل ہونے والا یہ ایئرپورٹ نہ صرف مقامی بلکہ بین الاقوامی پروازوں کے لیے بھی موزوں ہوگا۔
آپریشنل سرگرمیوں کی شروعات
نیو گوادر انٹرنیشنل ایئرپورٹ کو فلائٹ ریڈار پر باقاعدہ طور پر ٹیگ کر دیا گیا ہے، جبکہ پرانے گوادر ایئرپورٹ سے یہ ٹیگ ہٹا دیا گیا ہے۔ ایئرپورٹ کا علامتی افتتاح 14 اکتوبر 2024 کو وزیرِ اعظم شہباز شریف نے کیا تھا، لیکن آج سے یہاں پروازوں کی باقاعدہ لینڈنگ کا آغاز ہوا۔
سی پیک کا اہم سنگِ میل
نیو گوادر ایئرپورٹ کا افتتاح سی پیک کوریڈور کی کامیابیوں میں ایک اور اہم سنگِ میل ہے۔ یہ منصوبہ نہ صرف مقامی معیشت بلکہ بین الاقوامی تجارت کے لیے بھی نئی راہیں کھولے گا، جو پاکستان کے اقتصادی مستقبل میں اہم کردار ادا کرے گا۔∎
