اسلام آباد (تھرسڈے ٹائمز) — امریکی کانگریس کے ایک اعلیٰ سطحی وفد جس کی قیادت جیک برگمین کر رہے تھے اور جن کے ہمراہ تھامس سوزی اور جوناتھن جیکسن شامل تھے، آج چیف آف آرمی اسٹاف جنرل سید عاصم منیر سے جی ایچ کیو میں ملاقات کی۔ ملاقات میں دو طرفہ دلچسپی کے متعدد امور پر بات چیت کی گئی، جس میں خاص توجہ علاقائی سلامتی، دفاعی تعاون اور اسٹریٹیجک مفادات کے اشتراک پر مرکوز رہی۔
چیف آف آرمی اسٹاف جنرل سید عاصم منیر سے امریکی کانگریس کے اعلیٰ سطحی وفد کی ملاقات، علاقائی سلامتی و دفاعی تعاون پر تبادلہ خیال۔ وفد نے دہشت گردی کے خلاف پاک فوج کے کردار اور خطے میں امن کیلئے پاکستان کی کوششوں کو سراہا۔ pic.twitter.com/GU2TMFIH0m
— The Thursday Times (@thursday_times) April 13, 2025
علاقائی سلامتی اور دفاعی تعاون
ملاقات کے دوران خطے کی بدلتی ہوئی سیکیورٹی صورتحال، دفاعی استعداد، اور انسداد دہشتگردی کے شعبوں میں ممکنہ تعاون پر مفصل گفتگو ہوئی۔ دونوں فریقین نے اس بات پر زور دیا کہ پاک امریکہ تعلقات کو صرف سیکیورٹی تک محدود رکھنے کے بجائے وسیع بنیادوں پر آگے بڑھانے کی ضرورت ہے، جس میں استحکام، خودمختاری اور مشترکہ مفادات کا احترام بنیادی اصول ہوں۔
انسداد دہشتگردی میں پاکستان کا کردار سراہا گیا
امریکی وفد نے پاکستان کی مسلح افواج کے دہشتگردی کے خلاف کلیدی کردار کو سراہا۔ ان کا ماننا تھا کہ پاکستان کی قربانیوں اور مسلسل کوششوں نے نہ صرف ملکی بلکہ علاقائی سطح پر امن و استحکام کو ممکن بنایا۔ پاکستان کی صلاحیت، مزاحمت اور عوامی سطح پر طاقت کو ایک اسٹریٹیجک اثاثہ قرار دیا گیا۔
پاکستان کی خودمختاری اور باہمی عزت کا اعتراف
وفد نے پاکستان کی خودمختاری کا مکمل احترام ظاہر کرتے ہوئے سیکیورٹی، تجارت، سرمایہ کاری اور معاشی ترقی کے شعبوں میں جامع تعاون کے فروغ کا عزم ظاہر کیا۔ انہوں نے کہا کہ موجودہ عالمی حالات میں دونوں ممالک کے درمیان تعلقات کو ازسرنو متحرک کرنا اہم ہے، بشرطیکہ یہ تعلقات باہمی عزت، برابری اور قومی مفادات کی بنیاد پر قائم ہوں۔
آئی ٹی تربیت پر مفاہمتی معاہدے
ملاقات کے دوران انفارمیشن ٹیکنالوجی کے میدان میں تربیتی تعاون کیلئے یادداشتِ مفاہمت پر دستخط کیے گئے۔ یہ معاہدے نہ صرف پاکستان کے نوجوانوں کیلئے جدید تکنیکی مہارتوں کا دروازہ کھولیں گے بلکہ دوطرفہ تعلقات کو ڈیجیٹل میدان میں وسعت دینے کا ذریعہ بھی بنیں گے۔
پاکستان امریکہ تعلقات میں وسعت کی خواہش
چیف آف آرمی اسٹاف جنرل سید عاصم منیر نے امریکی وفد کے دورے کا خیرمقدم کرتے ہوئے کہا کہ پاکستان امریکہ کے ساتھ اپنے دیرینہ تعلقات کو مزید گہرا اور متنوع بنانے کا خواہشمند ہے۔ ان کا کہنا تھا کہ یہ شراکت داری دونوں ممالک کے قومی مفادات کے احترام اور باہمی فائدے پر مبنی ہونی چاہیے۔∎
