کراچی (تھرسڈے ٹائمز) — وفاقی حکومت کی جانب سے آئندہ مالی سال کا بجٹ پیش کیے جانے کے بعد پاکستان سٹاک مارکیٹ میں زبردست تیزی، ہنڈرڈ انڈیکس میں 2 ہزار سے زائد پوائنٹس کا اضافہ، سٹاک ایکسچینج 1 لاکھ 24 ہزار کی تاریخی سطح عبور کر گیا۔
آج سٹاک مارکیٹ میں کاروبار کے آغاز سے ہی زبردست تیزی کا رجحان نظر آ رہا ہے، گزشتہ روز 1 لاکھ 22 ہزار 24 اعشاریہ 44 پوائنٹس پر بند ہونے والا سٹاک ایکسچینج 1 لاکھ 24 ہزار 116 اعشاریہ 10 پوائنٹس تک پہنچ گیا ہے جبکہ مجموعی طور پر بینچ مارک ہنڈرڈ انڈیکس میں اب تک 2 ہزار 91 اعشاریہ 66 پوائنٹس (ایک اعشاریہ 69 فیصد) کا نمایاں اضافہ ہوا ہے۔
کاروباری ہفتے کے تیسرے روز یہ نمایاں اضافہ گزشتہ روز وفاقی حکومت کی جانب سے پیش کیے گئے بجٹ کے بعد سامنے آیا ہے جو کہ سرمایہ کاروں کے اعتماد میں اضافہ کو واضح کرتا ہے۔
تجارتی حجم کو دیکھا جائے تو 54 کروڑ 59 لاکھ 32 ہزار 737 حصص کا تبادلہ ہوا ہے جبکہ تجارتی مالیت 22 ارب 83 کروڑ 27 لاکھ 58 ہزار 150 روپے رہی ہے۔
تجزیہ کاروں کا کہنا ہے کہ بجٹ میں بیان کیے گئے اقدامات اور معاشی اشارے سٹاک مارکیٹ میں اس مثبت ردعمل کی وجوہات ہیں جس سے مستقبل میں مزید ترقی کے امکانات کی امید پیدا ہوئی ہے۔
