راولپنڈی (تھرسڈے ٹائمز) — فیلڈ مارشل عاصم منیر نے کہا ہے کہ بھارت ’’معرکہِ حق‘‘ میں شکست کے بعد اب اپنی مذموم سازشوں کیلئے پراکسی وار کو بڑھا رہا ہے جبکہ ’’فتنۃ الخوارج‘‘ اور ’’فتنۃ الہندوستان‘‘ بھارت کی ہائبرڈ وار کے مہرے ہیں، ملک کو درپیش اندرونی یا بیرونی خطرات کا منہ توڑ جواب دینے کیلئے پاک فوج ہر دم تیار ہے تاکہ قومی وقار کے تحفظ اور عوام کی سلامتی کو یقینی بنایا جا سکے۔
پاک فوج کے شعبہ تعلقاتِ عامہ (آئی ایس پی آر) کے مطابق آرمی چیف فیلڈ مارشل عاصم منیر نے 16ویں نیشنل ورکشاپ بلوچستان کے شرکاء سے خطاب کے دوران قومی یکجہتی اور بلوچستان کی ترقی پر زور دیتے ہوئے بھارت کی پراکسی جنگ کی مذمت کی اور بلوچستان کی ترقی پر زور دیا۔
پاک فوج کے سربراہ فیلڈ مارشل عاصم منیر نے دہشتگردی کے خاتمہ کیلئے پاک فوج کے غیر متزلزل عزم کا اظہار کرتے ہوئے بلوچستان کی سماجی و اقتصادی ترقی کی ناگزیر اہمیت کو قومی یکجہتی و استحکام کیلئے لازمی قرار دیا۔
انٹر سروسز پبلک ریلیشنز (آئی ایس پی آر) کے مطابق آرمی چیف نے بھارت کی جانب سے دہشتگرد گروہوں کی کھلم کھلا سرپرستی کی شدید الفاظ میں مذمت کرتے ہوئے کہا ہے کہ یہ ایک ناکام کوشش ہے جو بلوچستان کے عوام کی گہری حب الوطنی کو نشانہ بنانے کیلئے کی جا رہی ہے، بھارت ’’معرکہِ حق‘‘ میں شکست کے بعد اب اپنی مذموم سازشوں کیلئے پراکسی وار کو بڑھا رہا ہے۔
فیلڈ مارشل عاصم منیر نے ’’فتنۃ الخوارج‘‘ اور ’’فتنۃ الہندوستان‘‘ کو بھارت کی ہائبرڈ وار کے مہرے قرار دیتے ہوئے کہا کہ اِن گروہوں کا بھی انشاءاللّٰه وہی انجام ہو گا جو معرکہِ حق میں پیش روؤں کا ہوا، دہشتگرد کسی مذہب، مسلک یا قومیت کی حدود کے پابند نہیں ہوتے، اِس لیے اُن کے خلاف قومی سطح پر یکجہتی اور اجتماعی عزم ناگزیر ہے۔
آئی ایس پی آر کے مطابق آرمی چیف جنرل عاصم منیر نے بلوچستان میں ترقیاتی منصوبوں کی اہمیت کو اجاگر کیا اور مختلف اداروں کے مابین مؤثر ہم آہنگی اور قومی سطح پر مشترکہ حکمتِ عملی اپنانے پر زور دیا تاکہ صوبہ کی ترقی اور ملکی خوشحالی کو فروغ دیا جا سکے۔
آرمی چیف فیلڈ مارشل عاصم منیر نے علاقائی امن کیلئے پاکستان کے عزم کا اعادہ کرتے ہوئے کہا کہ ملک کو درپیش اندرونی یا بیرونی خطرات کا منہ توڑ جواب دینے کیلئے پاک فوج ہر دم تیار ہے تاکہ قومی وقار کے تحفظ اور عوام کی سلامتی کو یقینی بنایا جا سکے۔
پاک فوج کے شعبہ تعلقاتِ عامہ (انٹر سروسز پبلک ریلیشنز) کے مطابق 16ویں نیشنل ورکشاپ بلوچستان کے اختتام پر آرمی چیف فیلڈ مارشل جنرل عاصم منیر اور شرکاء کے مابین ایک کھلا اور بصیرت افروز مکالمہ بھی ہوا۔
