کراچی (تھرسڈے ٹائمز) — پاکستان سٹاک مارکیٹ میں ریکارڈ ساز بلندی، بینچ مارک ہنڈرڈ انڈیکس میں 1200 سے زائد پوائنٹس کا اضافہ، سٹاک ایکسچینج تاریخ کی نئی بلند ترین سطح پر پہنچ گیا۔
کاروباری ہفتہ کے دوسرے روز پاکستان سٹاک مارکیٹ میں آغاز سے زبردست تیزی کا رجحان رہا ہے، بینچ مارک ہنڈرڈ انڈیکس میں 1200 سے زائد پوائنٹس اضافہ کے ساتھ سٹاک ایکسچینج 1 لاکھ 43 ہزار کی تاریخی سطح عبور کر گیا ہے۔
گزشتہ کاروباری روز کے اختتام پر 1 لاکھ 42 ہزار 52 اعشاریہ 64 پوائنٹس پر بند ہونے والا سٹاک ایکسچینج آج مجموعی طور پر ہنڈرڈ انڈیکس میں 1 ہزار 228 اعشاریہ 7 پوائنٹس کے نمایاں اضافہ کے ساتھ 1 لاکھ 43 ہزار 281 اعشاریہ 34 پوائنٹس کی بلند ترین سطح پر پہنچ چکا ہے۔
آج کاروبار کے دوران اب تک کے تجارتی حجم کو دیکھا جائے تو 54 کروڑ 63 لاکھ 93 ہزار 670 سے زائد حصص کا تبادلہ ہو چکا ہے جبکہ تجارتی مالیت 36 ارب 79 کروڑ 83 لاکھ 65 ہزار 900 روپے سے زائد رہی ہے۔
