اسلام آباد (تھرسڈے ٹائمز) — اسرائیلی وزیراعظم بینجمن نیتن یاہو نے پاکستان کے خلاف جنگ کے دوران بھارت کی جانب سے اسرائیلی ساختہ ہتھیاروں کے استعمال کی باضابطہ تصدیق کر دی۔
بھارتی ’’این ڈی ٹی وی‘‘ کے مطابق اسرائیلی وزیراعظم بینجمن نیتن یاہو نے باضابطہ طور پر تصدیق کی ہے کہ بھارت نے مئی میں آپریشن سندور (پاکستان کے خلاف جنگ) کے دوران اسرائیلی ساختہ ہتھیار استعمال کیے جن میں بارک 8 میزائل سسٹم — جو بھارت کے ڈیفینس ریسرچ اینڈ ڈویلپمنٹ آرگنائزیشن (ڈی آر ڈی او) کے ساتھ مشترکہ طور پر تیار کیا گیا ہے — اور ہارپی ڈرونز شامل تھے جو پاکستانی اہداف پر کارروائی میں استعمال کیے گئے۔
یہ کارروائی بھارت کی جانب سے پہلگام میں سیاحوں پر حملے پر پاکستان کو موردِ الزام ٹھہرانے کے بعد کی گئی تھی تاہم بھارت اِس الزام کو ثابت کرنے کیلئے کوئی ٹھوس شواہد فراہم نہیں کر سکا۔
پاکستان کا بھرپور جواب اور فضائی جھڑپ
بھارتی حملہ کے جواب میں پاکستان نے اپنی فضائیہ کو متحرک کرتے ہوئے فرانسیسی ساختہ رافیل سمیت کئی بھارتی جنگی طیارے مار گرانے کا دعویٰ کیا جبکہ ’’رائٹرز‘‘ کے مطابق پاکستان نے چینی جے 10 سی طیارے اور پی ایل 15 میزائل استعمال کرتے ہوئے رافیل طیارہ کو نشانہ بنایا۔
بھارتی اعتراف؛ طیاروں کی تباہی
اِس جھڑپ کے بعد بھارتی فوج نے یہ اعتراف کیا ہے کہ اسے لڑاکا طیاروں کا نقصان ہوا ہے تاہم بھارت کی جانب سے تباہ ہونے والے طیاروں کی تعداد نہیں بتائی گئی۔ بھارت کے چیف آف ڈیفینس سٹاف جنرل چوہان نے ’’بلومبرگ‘‘ ٹی وی‘‘ سے گفتگو کرتے ہوئے اِس کی تصدیق کی تاہم یہ واضح نہیں کیا کہ کتنے طیارے ضائع ہوئے۔ یہ اعتراف بھارت کی جانب سے ایک اہم پالیسی تبدیلی کی علامت ہے کیونکہ اِس سے قبل بھارت ایسے دعووں کو یکسر مسترد کرتا رہا تھا۔
بریکنگ؛
بھارتی فوج کے سربراہ جنرل انیل چوہان نے پاکستان کے ساتھ فضائی جھڑپ میں پاکستان کی جانب سے متعدد بھارتی طیارے تباہ کیے جانے کا اعتراف کرلیا۔via: Bloomberg TV pic.twitter.com/MJ7O0m5wuT
— The Thursday Times (@thursday_times) May 31, 2025
اندرونی تضادات اور سفارتی تردید
بھارتی ڈیفینس سیکرٹری آر کے سنگھ نے بعدازاں یہ بیان دیا کہ ’’رافیل طیارے محفوظ رہے‘‘ اور پاکستان کو زیادہ جانی نقصان ہوا جس میں ’’سو سے زائد دہشتگرد‘‘ مارے جانے کا دعویٰ کیا گیا تاہم یہ دعوے اب بھارت کے اپنے فوجی سربراہ کے بیان سے متضاد ہیں۔
ٹرمپ کا بیان؛ پانچ طیارے گرائے گئے
امریکی صدر ڈونلڈ ٹرمپ نے اِس تنازع کو ایٹمی جنگ کے قریب قرار دیتے ہوئے دعویٰ کیا کہ ’’پانچ طیارے مار گرائے گئے‘‘۔
ڈونلڈ ٹرمپ نے کہا کہ یہ صورتحال اتنی سنگین تھی کہ انہیں ذاتی طور پر مداخلت کرنا پڑی تاکہ پاکستان اور بھارت کے درمیان مکمل جنگ کو روکا جا سکے۔
امریکی صدر ڈونلڈ ٹرمپ نے ایک مرتبہ پھر پاکستان اور بھارت مابین جنگ بند کروانے کا ذکر کردیا۔ pic.twitter.com/23fGHKmwNt
— The Thursday Times (@thursday_times) August 5, 2025
امریکی صدر کی جانب سے یہ دعویٰ تیس سے زائد مرتبہ پاک بھارت جنگ رکوانے کے حوالہ سے اپنی سفارتی کامیابی کا ذکر کرتے ہوئے کیا گیا۔
