امریکی صدر ڈونلڈ ٹرمپ کا امریکی جنرلز سے خطاب، فیلڈ مارشل عاصم منیر کی تعریف

واشنگٹن (تھرسڈے ٹائمز) — امریکی صدر ڈونلڈ ٹرمپ نے ورجینیا میں امریکی جنرلز سے خطاب کرتے ہوئے کہا ہے کہ چند روز قبل وزیراعظم پاکستان شہباز شریف اور پاکستان کے فیلڈ مارشل عاصم منیر ان سے ملنے کے لیے آئے تھے۔ اس موقع پر صدر ٹرمپ نے بتایا کہ فیلڈ مارشل نے ان سے کہا: “صدر ٹرمپ نے ایک خوفناک جنگ کو روک کر لاکھوں زندگیاں بچائیں۔” صدر ٹرمپ نے کہا کہ یہ الفاظ سن کر انہیں بے حد فخر محسوس ہوا اور حقیقت یہی ہے کہ جنگ کے رکنے سے بے شمار زندگیاں محفوظ ہوئیں۔

تین دن قبل وزیراعظم پاکستان شہباز شریف یہاں موجود تھے اور ان کے ساتھ فیلڈ مارشل عاصم منیر بھی تھے جو پاکستان میں نہایت اہم شخصیت ہیں۔ انہوں نے کہا کہ صدر ٹرمپ نے ایک خوفناک جنگ کو آگے بڑھنے سے روک کر لاکھوں زندگیاں بچائیں۔ میں اس بات پر بے حد فخر محسوس کرتا ہوں اور مجھے ان کا… pic.twitter.com/S5k8w8YkFl

— The Thursday Times (@thursday_times) September 30, 2025

امریکی صدر ڈونلڈ ٹرمپ نے کہا کہ انہوں نے پاکستان اور بھارت کے درمیان ایک ممکنہ خوفناک جنگ کو روک کر لاکھوں زندگیاں بچائیں۔ ان کا کہنا ہے کہ اگر بروقت مداخلت نہ کی جاتی تو دونوں ایٹمی طاقتوں کے درمیان جنگ چھڑ سکتی تھی جو دنیا کے لیے تباہ کن ثابت ہوتی۔

صدر ٹرمپ نے مزید بتایا کہ اس وقت دونوں ممالک کے درمیان کشیدگی اس حد تک بڑھ گئی تھی کہ سات طیارے مار گرائے جا چکے تھے اور جنگ کا آغاز کسی بھی وقت ہو سکتا تھا۔ انہوں نے کہا: “میں نے دونوں ممالک کو فون کر کے دوٹوک پیغام دیا کہ اگر جنگ ہوئی تو امریکہ کسی کے ساتھ تجارت نہیں کرے گا۔” ان کے مطابق یہ پیغام ہی وہ موڑ تھا جس نے حالات کو قابو میں لانے میں مدد دی۔

میں نے پاکستان اور بھارت کے مابین جنگ ختم کروائی، اس وقت تک سات جہاز گرائے جاچکے تھے۔ میں نے کہا کہ اگر جنگ ہوگی تو پھر تجارت نہیں ہوگی، اسکے بعد جنگ ختم ہوگئی۔
امریکی صدر دونلڈ ٹرمپ pic.twitter.com/n1TNWm6ptQ

— The Thursday Times (@thursday_times) September 30, 2025

انہوں نے کہا کہ کشیدگی چار روز تک جاری رہی لیکن امریکی دباؤ کے نتیجے میں بالآخر حالات سنبھل گئے۔ صدر ٹرمپ کے بقول: “ہم نے صرف لاکھوں نہیں بلکہ کروڑوں زندگیاں بچائیں اور دنیا کو ایک بڑے بحران سے محفوظ کر دیا۔”