واشنگٹن (تھرسڈے ٹائمز) — امریکی صدر ڈونلڈ ٹرمپ اور روسی صدر ولادیمیر پیوٹن کی ہنگری کے دارالحکومت بُڈاپیسٹ میں مجوزہ ملاقات کے مقام سے متعلق سوال پر وائٹ ہاؤس کی ترجمان کیرولائن لیوٹ کا مختصر مگر غیر متوقع جواب عالمی میڈیا کی زینت بن گیا۔
گزشتہ ہفتے دونوں رہنماؤں کے درمیان ایک طویل ٹیلی فونک گفتگو ہوئی تھی، جس میں یوکرین تنازع اور علاقائی سلامتی پر بات چیت کے بعد بڈاپیسٹ میں ملاقات پر اتفاق کیا گیا۔
تاہم اس ملاقات کے مقام کے بارے میں جب ایک صحافی نے پریس کانفرنس کے دوران سوال کیا کہ “یہ فیصلہ کس نے کیا کہ ملاقات بڈاپیسٹ میں ہوگی؟” تو کیرولائن لیوٹ نے مسکراتے ہوئے جواب دیا: تمہاری ماں نے۔
یہ جملہ سنتے ہی پریس روم میں حیرانی کی لہر دوڑ گئی۔ رپورٹر نے وضاحت چاہی کہ کیا یہ تبصرہ مزاح کے طور پر تھا؟ جس پر لیوٹ نے طنزیہ انداز میں کہا؛
آپ بائیں بازو کے ایک ایسے شخص ہیں جو خود کو صحافی کہتے ہیں، مگر کوئی آپ کو سنجیدہ نہیں لیتا — حتیٰ کہ آپ کے اپنے ساتھی بھی نہیں۔ مجھ سے فضول سوالات کرنا بند کریں۔
