اسلام آباد (تھرسڈے ٹائمز) — فیلڈ مارشل عاصم منیر نے کہا ہے کہ بھارت کے خلاف جنگ میں اللّٰه نے پاکستان کو سربلند کیا، پاکستان امن پسند ملک ہے، ہم جنگ مسلط کرنے والوں کو اسی طرح جواب دیں گے جیسے مئی میں دیا تھا۔
اردن کے بادشاہ شاہ عبداللّٰہ دوم کو اعلیٰ ترین سول اعزاز سے نوازنے کی تقریب اسلام آباد کے ایوانِ صدر میں منعقد ہوئی جہاں بادشاہِ اردن کے اعزاز میں ظہرانے کا اہتمام کیا گیا جبکہ تقریب میں چیف آف آرمی سٹاف فیلڈ مارشل عاصم منیر نے بھی شرکت کی ہے۔
صدر آصف علی زرداری نے ایوانِ صدر میں منعقدہ خصوصی اعزازی تقریب میں سلطنتِ اردن کے فرماں روا شاہ عبداللّٰہ دوم ابن الحسین کو نشانِ پاکستان عطا کیا۔ pic.twitter.com/zNYFZMCOUL
— The Thursday Times (@thursday_times) November 16, 2025
اِس موقع پر غیر رسمی گفتگو کرتے ہوئے فیلڈ مارشل عاصم منیر نے کہا ہے کہ غزوہِ احد میں مٹی ڈالنے سے فتح حاصل ہوئی تھی، جب مسلمان اللّٰه پر بھروسہ کرتا ہے تو دشمن پر پھینکی ہوئی مٹی بھی میزائل بن جاتی ہے، میں اپنے فرائض کی انجام دہی اللّٰه کے حکم کے مطابق کرتا ہوں۔
چیف آف آرمی سٹاف فیلڈ مارشل عاصم منیر کا کہنا تھا کہ بھارت کے خلاف جنگ میں اللّٰه نے پاکستان کو سربلند کیا، پاکستان امن پسند ملک ہے، ہم جنگ مسلط کرنے والوں کو اسی طرح جواب دیں گے جیسے مئی میں دیا تھا۔
معزز مہمان شاہ عبداللّٰہ دوم کو نشانِ پاکستان سے نوازنے کی تقریب سے خطاب کرتے ہوئے جنرل عاصم منیر نے مزید کہا کہ اللّٰه کے شکر گزار ہیں جس نے ہمیں فتح دلائی، یہ کامیابی اللّٰه کی طرف سے ہے۔
