واشنگٹن (تھرسڈے ٹائمز) — امریکی صدر ڈونلڈ ٹرمپ نے کہا ہے کہ ہم پاکستان کے ساتھ بہت جلد تجارتی ڈیل کرنے جا رہے ہیں، اس حوالہ سے پاکستان کے ساتھ مذاکرات جلد ہوں گے، میری حکومت نے بھارت اور پاکستان کے درمیان ایک مکمل اور فوری جنگ بندی کروانے میں اہم کردار ادا کیا جس پر مجھے فخر ہے۔
امریکی صدر ڈونلڈ ٹرمپ کا پاکستان کے ساتھ تجارتی مذاکرات کرنے کا اعلان؛
پاکستان اور بھارت مابین جنگ رکوانے پر بہت مدد کی ہے۔ ہم نے انہیں تجارت کی آفر دی اور کہا کہ جنگ بند کریں اورہمارے ساتھ تجارتی ڈیل کریں۔ ہم پاکستان کے ساتھ بہت جلد تجارتی ڈیل کرنے جارہے ہیں اور جلد اس بارے… pic.twitter.com/Jg1sX8CGUz— The Thursday Times (@thursday_times) May 12, 2025
امریکا کے صدر ڈونلڈ ٹرمپ نے میڈیا سے بات چیت کے دوران پاک بھارت جنگ اور سیز فائر سے متعلق اظہارِ خیال کرتے ہوئے کہا ہے کہ ہفتہ کے روز میری حکومت نے بھارت اور پاکستان کے درمیان ایک مکمل اور فوری جنگ بندی کروانے میں اہم کردار ادا کیا، میرا خیال ہے کہ یہ جنگ بندی مستقل نوعیت کی ہو گی جس سے دو ایٹمی قوتوں کے درمیان ایک خطرناک تصادم کا خاتمہ ہوا ہے، پاکستان اور بھارت شدید کشیدگی میں الجھے ہوئے تھے اور بظاہر اس کا اختتام ہوتا دکھائی نہیں دے رہا تھا۔
ڈونلڈ ٹرمپ کا کہنا تھا کہ مجھے یہ بتاتے ہوئے فخر محسوس ہو رہا ہے کہ بھارت اور پاکستان کی قیادت نے غیر متزلزل اور مؤثر انداز میں حالات کی سنگینی کو سمجھا اور دونوں راہنماؤں نے غیرمعمولی حکمت، قوتِ فیصلہ اور بصیرت کا مظاہرہ کیا، ہم نے اس عمل میں تجارت کے ذریعہ بھی اپنا کردار ادا کیا ہے، میں نے ان سے کہا کہ آؤ ہم آپ کے ساتھ وسیع پیمانے پر تجارت کریں گے مگر پہلے یہ لڑائی بند کرو، اگر تم جنگ بند کرو گے تو ہم تجارتی معاہدے کریں گے اور اگر نہیں تو کوئی تجارت نہیں ہو گی۔
امریکی صدر نے کہا کہ لوگوں نے ماضی میں کبھی تجارت کو اس طرح سفارتی دباؤ کیلئے بطور آلہ استعمال نہیں کیا جیسے میں نے کیا اور مجھے اس پر فخر ہے، اچانک انہوں نے کہا کہ ہمیں رک جانا چاہیے اور وہ رک گئے، انہوں نے یہ فیصلہ کئی وجوہات کی بناء پر کیا مگر تجارت بھی ایک بڑی وجہ تھی، ہم پاکستان کے ساتھ وسیع پیمانے پر تجارت کریں گے، بھارت کے ساتھ بھی اور اس وقت بھارت کے ساتھ تجارتی مذاکرات جاری ہیں، جلد ہی ہم پاکستان کے ساتھ بھی تجارتی مذاکرات شروع کریں گے۔
امریکا کے صدر کا کہنا تھا کہ ہم نے ایک ممکنہ ایٹمی تصادم کو روکا، ایک ایسا تصادم جس کے نتیجہ میں لاکھوں جانیں جا سکتی تھیں، مجھے اس بات پر بہت فخر ہے، میں نائب صدر اور وزیرِ خارجہ کا بھی شکریہ ادا کرنا چاہتا ہوں جنہوں نے اس مقصد کیلئے بہت محنت کی، ان کی کوششوں سے یہ کامیابی ممکن ہوئی۔
امریکی صدر ڈونلڈ ٹرمپ نے مزید کہا کہ ہم نے پاکستان اور بھارت کے مابین جنگ رکوانے پر بہت مدد کی ہے، ہم نے انہیں تجارت کی آفر دی اور کہا کہ جنگ بند کریں اور ہمارے ساتھ تجارتی ڈیل کریں، ہم پاکستان کے ساتھ بہت جلد تجارتی ڈیل کرنے جا رہے ہیں اور جلد اس بارے پاکستان کے ساتھ مذاکرات ہوں گے۔