اسلام آباد (تھرسڈے ٹائمز) — نائب وزیراعظم اسحاق ڈار نے کہا ہے کہ دہشتگردی کی بزدلانہ کارروائیاں اِس خطرے سے نمٹنے کیلئے ہمارے قومی عزم کو کبھی لَرزَہ بَر اَندام نہیں کر سکتیں، ہم ہر شکل اور ہر قسم کے دہشتگرد حملوں کی قطعی طور پر مذمت کرتے ہیں، دہشتگردی ہمارے دور کے بڑے عالمی چیلنجز میں سے ایک ہے۔
پاکستان کے نائب وزیراعظم و وزیرِ خارجہ اسحاق ڈار نے وفاقی دارالحکومت میں 2 روزہ انٹر پارلیمانی سپیکرز کانفرنس سے خطاب کیا ہے جس میں انہوں نے اسلام آباد میں ہونے والے خودکش دھماکے اور وانا میں کیڈٹ کالج پر ہونے والے حملے کا ذکر کرتے ہوئے کہا ہے کہ میں واضح کرتا ہوں کہ یہ بزدلانہ کارروائیاں اِس دہشتگردی سے نمٹنے کیلئے ہمارے قومی عزم کو کبھی لَرزَہ بَر اَندام نہیں کر سکتیں۔
اسحاق ڈار نے واضح کیا کہ ایسے حملے ہمیں کمزور نہیں کر سکتے بلکہ ہمیں مزید یقین دلاتے ہیں کہ امن و سلامتی کیلئے صرف بات چیت، سمجھ بوجھ اور تعاون ہی صحیح راستہ ہے۔ ہم نے گزشتہ 48 گھنٹوں کے دوران وانا اور اسلام آباد میں دو انتہائی گھناؤنے دہشتگرد حملے دیکھے ہیں جن میں 15 قیمتی جانیں ضائع ہوئی ہیں۔
نائب وزیراعظم و وزیرِ خارجہ اسحاق ڈار نے اسلام آباد اور وانا میں کیے گئے دہشتگردانہ حملوں کی شدید مذمت کرتے ہوئے اور متاثرہ خاندانوں سے اظہارِ ہمدردی کرتے ہوئے کہا ہے کہ ہم ہر شکل اور ہر قسم کے دہشتگرد حملوں کی قطعی طور پر مذمت کرتے ہیں۔
اسحاق ڈار کا مزید کہنا تھا کہ دہشتگردی ہمارے دور کے بڑے عالمی چیلنجز میں سے ایک ہے، پاکستان اِس خطرے کے خلاف ایک مضبوط مزاحمت کار رہا ہے جو کسی سرحد، مذہب، جنس، نسل یا قومیت کو تسلیم نہیں کرتا۔
