کراچی (تھرسڈے ٹائمز) — سال 2025 کے آخری روز پاکستان سٹاک مارکیٹ میں نئی تاریخ رقم، سٹاک ایکسچینج 1 لاکھ 75 ہزار پوائنٹس کی نفسیاتی حد عبور کر گیا۔
سال 2025 کے آخری اور کاروباری ہفتہ کے تیسرے روز پاکستان سٹاک مارکیٹ میں کاروبار کے آغاز میں زبردست تیزی کا رجحان نظر آیا، بینچ مارک KSE ہنڈرڈ انڈیکس میں 750 سے زائد پوائنٹس اضافہ کے ساتھ سٹاک ایکسچینج 1 لاکھ 75 ہزار پوائنٹس کی تاریخی سطح عبور کر گیا۔
گزشتہ کاروباری روز کے اختتام پر 1 لاکھ 74 ہزار 472 پر بند ہونے والا سٹاک ایکسچینج آج ہنڈرڈ انڈیکس میں 760 اعشاریہ 11 پوائنٹس کے اضافہ کے ساتھ 1 لاکھ 75 ہزار 232 پوائنٹس کی بلند ترین سطح تک پہنچ گیا۔
آج کاروبار کے دوران اب تک کے تجارتی حجم کو دیکھا جائے تو 37 کروڑ 38 لاکھ 61 ہزار 443 سے زائد حصص کا تبادلہ ہو چکا ہے جبکہ تجارتی مالیت 16 ارب 28 کروڑ 85 لاکھ 42 ہزار 192 روپے سے زائد رہی ہے۔
