واشنگٹن (تھرسڈے ٹائمز) — امریکی صدر جوبائیڈن نے کہا ہے کہ ہم عوام کا فیصلہ تسلیم کرتے ہیں، جنوری میں اقتدار کی منتقلی پُرامن ہو گی۔
امریکا میں نئے صدر کیلئے الیکشن کے بعد امریکی صدر جوبائیڈن نے پہلی بار خطاب کرتے ہوئے کہا ہے کہ ہم عوام کا فیصلہ تسلیم کرتے ہیں، امریکا کا الیکٹورل سسٹم شفاف ہے، اقتدار کی منتقلی 20 جنوری کو پُرامن طریقہ سے ہو گی، بطور امریکی صدر عہدے کی پُرامن حوالگی میرا فرض ہے۔
امریکی صدر جوبائیڈن نے کہا ہے کہ جمہوریت میں ہمیشہ عوام کی رائے چلتی ہے، صرف جیت پر ہی مُلک سے پیار کا اظہار نہیں کیا جاتا، امریکی عوام نے جو انتخاب کیا ہے ہم اس کو قبول کرتے ہیں، کمیلا ہیرس نے بہترین انتخابی مہم چلائی، ہم نے امریکا کی تاریخی صدارت کی، ہم مضبوط امریکی معیشت چھوڑ کر جا رہے ہیں۔
امریکا کے 46ویں صدر جوزف روبنیٹ بائیڈن جونیئر کا کہنا تھا کہ گزشتہ روز ڈونلڈ ٹرمپ سے فون کال پر بات کی اور انہیں جیت پر مبارکباد پیش کی ہے، ڈونلڈ ٹرمپ کو یقین دلایا کہ انتظامیہ ان کی ٹیم کے ساتھ کام کرے گی۔