ریاض (تھرسڈے ٹائمز) — سعودی عرب کے وزیرِ دفاع شہزادہ خالد بن سلمان نے جمعرات کو ریاض میں پاکستان کے چیف آف آرمی اسٹاف فیلڈ مارشل سید عاصم منیر سے ملاقات کی۔ یہ دورہ اس ہفتے سعودی دارالحکومت میں جاری ورلڈ ڈیفنس شو کے تناظر میں مزید اہمیت اختیار کر گیا ہے۔
سعودی وزیرِ دفاع نے سوشل میڈیا پر جاری پوسٹ میں کہا کہ ملاقات کے دوران دونوں ممالک کے مضبوط تعلقات اور اسٹریٹجک دفاعی شراکت داری کی توثیق کی گئی۔ انہوں نے مزید بتایا کہ گفتگو میں عالمی امن و سلامتی کے فروغ کیلئے مشترکہ کوششوں پر بھی بات ہوئی، جو باہمی مفادات کے مطابق ہے۔
Met with Pakistan’s Chief of Army Staff and Chief of Defense Forces, Field Marshal Asim Munir, to reaffirm our strong relations and strategic defense partnership. We discussed our joint efforts to promote global peace and security in a manner that serves our shared interests. pic.twitter.com/3oCFI2t6RR
— Khalid bin Salman خالد بن سلمان (@kbsalsaud) February 12, 2026
مبصرین کے مطابق ورلڈ ڈیفنس شو کے دوران فیلڈ مارشل عاصم منیر کی ریاض میں موجودگی خاصی معنی خیز ہے، کیونکہ یہ دفاعی نمائش دفاعی سفارتکاری، خریداری سے متعلق رابطوں اور عسکری سطح پر تعاون کے مباحث کیلئے ایک بڑا پلیٹ فارم سمجھی جاتی ہے۔
سعودی وزیرِ دفاع کی پوسٹ کے مطابق ملاقات میں باہمی دلچسپی کے متعدد امور بھی زیرِ بحث آئے۔
یہ ملاقات ایسے وقت میں ہوئی ہے جب پاکستان اور سعودی عرب کے درمیان دفاعی تعاون پہلے ہی باضابطہ شکل اختیار کر چکا ہے، اور دونوں ممالک دفاعی شراکت داری کو مزید وسعت دینے پر زور دے رہے ہیں۔ پاکستان اور سعودی عرب کئی دہائیوں سے قریبی دفاعی تعلقات رکھتے ہیں، جن میں سیکیورٹی امور پر رابطہ کاری اور دونوں افواج کے مابین ادارہ جاتی سطح پر تعاون شامل ہے۔ ریاض میں یہ ملاقات بھی اسی تسلسل کا حصہ سمجھی جا رہی ہے۔
