SRINAGAR (The Thursday Times) — Hukkam ke mutabiq budh ko Bharat ke zer-e-intezam Kashmir ke zila Kulgam ke ilaqe Mirabazar mein motorcycle par sawar mushtaba dehshatgardon ki CRPF check post par firing se Central Reserve Police Force ke teen ahlkar zakhmi ho gaye.
CRPF ne aik bayan mein kaha, “Kulgam, Kashmir mein CRPF nake par firing hui hai. Teen ahlkar zakhmi hain. Hamla-awaron ko pakarne aur zakhmiyon ko behtareen ilaj faraham karne ke liye karrawaiyan jari hain.”
Hukkam ke mutabiq hamla-awar taqreeban dopehar sawa do baje hamla kar ke farar ho gaye. Aik afsar ke pait mein goli lagi aur us ki halat tashweeshnak hai, jabke deegar do ki chotein jaan-lewa nahin. Teenon ko qareebi zila Anantnag ke hospital muntaqil kiya gaya.
Zila mein sakht pabandiyan
Kumak aur baktar band gariyan tainaat ki gayin, izafi check posts qaim ki gayin, aur loudspeakers par rehaishiyon ko gharon mein rehne ki hidayat ki gayi. Hukkam ke mutabiq khitte ke Lieutenant Governor Manoj Sinha budh ko zila Kulgam ke daure par the lekin jaye-waqoo ke qareeb nahin the.
Opposition jamaat Congress ne wafaqi hukoomat ke in daawon par sawal uthaya ke khitte mein halaat maamool par aa chuke hain.
