سابق وزیر خزانہ سینیٹر اسحاق ڈار نے اپیل کی جلد سماعت کے لیے سپریم کورٹ میں درخواست دائر کی ہے جو 2018 سے عدالت میں زیر التوا ہے۔
احتساب عدالت کی جانب سے اسحاق ڈار کو اشتہاری قرار دینے کے خلاف سینیٹر اسحاق ڈار کی جانب سے 2018 ء میں ایک اپیل/درخواست دائر کی گئی تھی۔ واضع رہے کہ سینیٹر اسحاق ڈار کی طرف سے گزشتہ چار سالوں میں معاملے کی سماعت کے لئے دائر درخواستوں کے باوجود اپیل/درخواست نہیں سنی گئی۔
سپریم کورٹ میں اسحاق ڈار کے وکلا کی طرف سے دوبارہ ایک نئی درخواست دائر کی گئی ہے جس میں اپیل/پٹیشن کی جلد سماعت کی درخواست کی گئی جو 2018 ء سے پہلے ہی تاخیر کا شکار ہے۔
ڈائریکٹوریٹ جنرل آف امیگریشن اینڈ پاسپورٹ نے 24 جولائی 2018ء کو سینیٹر محمد اسحاق ڈار کو بغیر کسی بنیاد یا جواز کے سب سے پہلے ”بلیک لسٹ” کیا جس نے پاکستان میں پاسپورٹ حکام سمیت پاکستانی ہائی کمشنز/سفارت خانوں پر انہیں پاسپورٹ کے اجراء پر عملاً پابندی عائد کر دی۔
سینیٹر اسحاق ڈار کا پاسپورٹ 6 ستمبر 2018ء کو عمران خان کی حکومت کی جانب سے منسوخ کر دیا گیا تھا۔ مذکورہ غیر قانونی کارروائی اسحاق ڈار کی جانب سے مطلوبہ پاسپورٹ کے اجراء کیلئے تحریری درخواست کے باوجود کی گئی جو سفری مقاصد کے لئے ایک ضروری اور بنیادی حق ہے۔ پاسپورٹ کی منسوخی کی حقیقت اسحاق ڈار کے علم میں 9 ستمبر 2018ء کو میڈیا کے ذریعے آئی جب وہ برطانیہ میں اپنا علاج کروا رہے تھے۔
عمران خان کی حکومت نے مذکورہ کارروائیاں قانون اور انسانی حقوق کی خلاف ورزی کرتے ہوئے کیں جس کے نتیجے میں اسحاق ڈار ستمبر 2018ء کے بعد سے برطانیہ میں پھنسے ہوئے تھے جس کے باعث صحت میں بہتری کے باوجود اسحاق ڈار کا پاکستان کیلئے سفر ناممکن تھا۔
اسحاق ڈار کو مئی 2022ء میں نیا پاسپورٹ ملا جو اسلام آباد میں پاسپورٹ اتھارٹیز نے 26 اپریل 2022ء کو جاری کیا۔
