صوابی (تھرسڈے ٹائمز) — پاکستان تحریکِ انصاف کے جلسہ میں کارکن نے امریکی پرچم لہرا دیا، کارکنان اور انتظامیہ گتھم گتھا ہو گئے۔
پاکستان تحریکِ انصاف (پی ٹی آئی) نے خیبرپختونخوا کے ضلع صوابی میں جلسہ کا انعقاد کیا ہے جس سے وزیر اعلٰی خیبرپختونخوا علی امین گنڈا پور، عمران خان کے نامزد چیئرمین تحریکِ انصاف بیرسٹر گوہر، شیخ وقاص اکرم، سلمان اکرم راجہ، حماد اظہر اور دیگر راہنماؤں نے خطاب کیا ہے۔
صوابی میں پی ٹی آئی کے پاور شو میں شریک ایک کارکن نے جلسہ گاہ میں امریکی جھنڈا لہرا دیا جس پر کارکنان اور انتظامیہ گتھم گتھا ہو گئے، انتظامیہ نے کارکن سے امریکی جھنڈا چیھن لیا جبکہ پولیس نے کارکن کو حراست میں لے لیا، پولیس نے امریکی جھںڈا لہرانے والے کارکن کو گرفتار کر کے تھانے منتقل کر دیا ہے جبکہ ملزم سے تفتیش جاری ہے۔
واضح رہے کہ امریکی صدارتی انتخابات میں ڈونلڈ ٹرمپ کی کامیابی کے بعد پاکستان تحریکِ انصاف (پی ٹی آئی) کے کارکنان سے سوشل میڈیا پر اس توقع کا اظہار کیا ہے کہ ڈونلڈ ٹرمپ عمران خان کی رہائی کیلئے کردار ادا کریں گے، پی ٹی آئی راہنما علی محمد خان نے بھی ایک نجی نیوز چینل کو انٹرویو دیتے ہوئے بتایا کہ اڈیالہ جیل میں قید سابق وزیراعظم عمران خان نے ڈونلڈ ٹرمپ کی کامیابی پر خوشی کا اظہار کیا ہے۔
پاکستان تحریکِ انصاف (پی ٹی آئی) کے مفرور راہنما زلفی بخاری نے دعویٰ کیا ہے کہ وہ نو منتخب امریکی صدر ڈونلڈ ٹرمپ کے خاندان کے افراد اور قریبی راہنماؤں سے رابطے میں ہیں، زلفی بخاری نے کہا ہے کہ ڈونلڈ ٹرمپ امریکی صدر کا عہدہ سنبھالنے کے بعد عمران خان کی رہائی کیلئے کوششیں کریں گے۔