کینبرا (تھرسڈے ٹائمز) — عالمی یوم انسداد اسلاموفوبیا کے موقع پر آسٹریلیا کے وزیراعظم انتھونی البانیز نے اپنے خصوصی پیغام میں واضح طور پر کہا ہے کہ آسٹریلیا مسلم کمیونٹی کے خلاف ہر قسم کی نفرت اور دشمنی کی بھرپور مخالفت کرتا ہے اور اسلاموفوبیا کی کسی بھی شکل کو برداشت نہیں کیا جائے گا۔
— Anthony Albanese (@AlboMP) March 14, 2025
وزیراعظم البانیز نے زور دیتے ہوئے کہا کہ اسلاموفوبیا کے لیے آسٹریلیا میں کوئی جگہ نہیں ہے۔ انہوں نے واضح کیا کہ اس مسئلے کا مقابلہ بھرپور قانونی طاقت کے ساتھ کیا جائے گا کیونکہ اسلاموفوبیا کا رویہ ہماری قومی شناخت، اقدار، اور کئی نسلوں کی محنت سے تعمیر کردہ معاشرے کی روح کے خلاف ہے۔
اپنے پیغام میں انہوں نے مزید کہا کہ اس دن کی اہمیت میں اضافہ اس وجہ سے بھی ہوتا ہے کیونکہ یہ دن کرائسٹ چرچ کی مساجد پر ہونے والے ہولناک حملوں کی برسی کے ساتھ آتا ہے۔ ان حملوں میں 51 معصوم افراد کی زندگیاں چھین لی گئیں، اور اس واقعے نے بے شمار دیگر زندگیوں کو ہمیشہ کے لیے بدل کر رکھ دیا۔
وزیراعظم البانیز نے مسلم کمیونٹی کی آسٹریلیا میں موجودگی کو تاریخی طور پر ملک کی ترقی اور جدید شناخت کا اہم جزو قرار دیتے ہوئے کہا کہ مسلمان ہمارے ملک کی ترقی، ثقافتی ورثے اور قومی تشخص کے لازمی حصے ہیں۔ آسٹریلیا میں رہنے والے تمام مسلمانوں کو فخر کے ساتھ اپنی شناخت ظاہر کرنے اور مکمل آزادی کے ساتھ اپنے عقیدے پر عمل کرنے کا حق حاصل ہے۔
انہوں نے واضح کیا کہ تنوع اور جامعیت آسٹریلوی شناخت کی بنیادی اقدار ہیں، جن کا تحفظ کرنا ہم سب کی مشترکہ ذمہ داری ہے۔ وزیراعظم البانیز نے یقین دلایا کہ آسٹریلیا نفرت، تقسیم، اور عدم برداشت کی ہر کوشش کا بھرپور مقابلہ کرتا رہے گا تاکہ آسٹریلیا کے تمام شہری امن، ہم آہنگی، اور عزت کے ساتھ زندگی گزار سکیں۔