اسلام آباد (تھرسڈے ٹائمز) — پاکستان کے سابق وزیراعظم اور پاکستان پیپلز پارٹی کے بانی شہید ذوالفقار علی بھٹو کو ملک کے اعلیٰ ترین سول اعزاز ’نشانِ پاکستان‘ سے نوازا گیا ہے۔ صدر پاکستان آصف علی زرداری نے ایوانِ صدر اسلام آباد میں منعقدہ ایک باوقار تقریب میں یہ اعزاز ذوالفقار علی بھٹو کی صاحبزادی صنم بھٹو کے حوالے کیا۔ اس پُر وقار تقریب میں خاتونِ اول آصفہ بھٹو زرداری بھی خصوصی طور پر موجود تھیں۔
ذوالفقار بھٹو کو پاکستان کے اعلیٰ ترین سول ایوارڈ اعزاز نشان پاکستان سے نوازا گیا۔ ذوالفقار بھٹو کی صاحبزادی صنم بھٹو نے صدر آصف زرداری سے ایوارڈ وصول کیا۔ اس موقع پر خاتون اول آصفہ بھٹو زرداری بھی موجود تھیں۔ pic.twitter.com/eJPhQ1sMYF
— The Thursday Times (@thursday_times) March 23, 2025
اس تاریخی موقع پر صنم بھٹو نے صدر آصف علی زرداری سے ایوارڈ وصول کیا تو شرکاء نے کھڑے ہو کر احتراماً بھرپور تالیاں بجائیں۔ یہ ایوارڈ پاکستان کے لیے ذوالفقار علی بھٹو کی گراں قدر خدمات، سیاسی بصیرت اور جمہوری جدوجہد کے اعتراف میں دیا گیا۔
صدر مملکت آصف علی زرداری نے یومِ آزادی 14 اگست 2024 کو ملک کے لیے نمایاں خدمات سرانجام دینے والی 104 ملکی اور غیر ملکی شخصیات کے لیے سول اعزازات کا اعلان کیا تھا، جن میں سرِ فہرست ذوالفقار علی بھٹو کا نام شامل تھا۔ اس حوالے سے باقاعدہ تقریب یومِ پاکستان 23 مارچ 2025 کو ایوانِ صدر میں منعقد ہوئی۔
ذوالفقار علی بھٹو پاکستان کی سیاسی تاریخ کے اہم ترین رہنماؤں میں سے ایک ہیں، جنہوں نے ملک میں جمہوریت اور عوامی حقوق کی بحالی کے لیے جدوجہد کی اور قوم کو متفقہ آئین دیا۔ ان کی عظیم سیاسی قربانی کو آج بھی عوام قدر کی نگاہ سے دیکھتے ہیں۔
یہ تاریخی لمحہ نہ صرف بھٹو خاندان کے لیے بلکہ پاکستان کے جمہوریت پسند عوام کے لیے بھی ایک یادگار موقع تھا۔ اس تقریب میں اعلیٰ حکومتی عہدیداروں، سیاستدانوں اور سماجی شخصیات نے بڑی تعداد میں شرکت کی اور ذوالفقار علی بھٹو کی قومی خدمات کو بھرپور خراجِ تحسین پیش کیا گیا۔