واشنگٹن (تھرسڈے ٹائمز) — امریکی صدر ڈونلڈ ٹرمپ نے کہا ہے کہ ہم نے پاکستان اور بھارت کے درمیان ایک بڑے تنازع کو حل کیا، ہم پاکستان کے ساتھ ایک بڑا تجارتی معاہدہ کر رہے ہیں، میں کہوں گا کہ پاکستان کے پاس بہت شاندار لوگ ہیں اور واقعی فی الوقت ایک عظیم لیڈر بھی ہے۔
ہم نے پاکستان اور بھارت کے درمیان جاری کشیدگی کو ختم کروایا اور ایک بڑے تنازع کو حل کیا۔ اب ہم پاکستان کے ساتھ ایک بڑا تجارتی معاہدہ کرنے جا رہے ہیں۔ امریکی صدر ڈونلڈ ٹرمپ pic.twitter.com/YmAy482rhk
— The Thursday Times (@thursday_times) May 21, 2025
امریکا کے صدر ڈونلڈ ٹرمپ نے صحافیوں سے گفتگو کرتے ہوئے حالیہ پاک بھارت کشیدگی کے بارے میں بات کرتے ہوئے کہا ہے کہ ہم نے پاکستان اور بھارت کے درمیان ایک بڑے تنازع کو حل کیا، میرے خیال میں ہم نے ایک سمجھوتا کر لیا ہے، ہم پاکستان کے ساتھ ایک بڑا تجارتی معاہدہ کرنے جا رہے ہیں اور بھارت کے ساتھ بھی، میں نے ان سے کہا کہ تم لوگ کیا کر رہے ہو؟
ڈونلڈ ٹرمپ کا پاک بھارت تناؤ سے متعلق کہنا تھا کہ پاکستان اور بھارت کے درمیان تصادم کی صورتحال بد سے بدتر ہوتی جا رہی تھی، فائرنگ بڑھتی جا رہی تھی، جنگ دونوں ممالک کی سرحدوں کے اندر گہرائی تک جا چکی تھی، ہم نے ان سے بات کی اور میرا خیال ہے کہ ہم نے معاملہ حل کروا دیا۔
امریکی صدر ڈونلڈ ٹرمپ کا مزید کہنا تھا کہ یہ کہنا مجھے اچھا نہیں لگتا لیکن دو دن بعد کچھ ہو جاتا ہے اور سب کہتے ہیں کہ یہ ٹرمپ کی غلطی ہے، میں کہوں گا کہ پاکستان کے پاس بہت شاندار لوگ ہیں اور واقعی پاکستان کے پاس فی الوقت ایک عظیم لیڈر بھی ہے۔∎
