کوئٹہ (تھرسڈے ٹائمز) — وفاقی وزیر داخلہ محسن نقوی نے کہا ہے کہ بلوچستان میں ہونے والے حالیہ دہشتگرد حملوں میں بھارت پوری طرح ملوث ہے اور ان حملوں کی منصوبہ بندی اور پشت پناہی میں بھی بھارت کا براہِ راست کردار شامل رہا ہے۔ ان کا کہنا تھا کہ پاکستان کے پاس بھارت کی دہشتگردی میں شمولیت کے ناقابلِ تردید شواہد موجود ہیں، جو عالمی برادری کے سامنے پیش کیے جائیں گے۔
🚨 پوری دنیا کو بتانا چاہتے ہیں کہ بلوچستان میں ہونیوالے دہشتگرد حملوں میں بھارت پوری طرح ملوث ہے۔ دہشتگرد حملوں کی منصوبہ بندی اور پشت پناہی میں بھارت ملوث ہے۔ پاکستان کے پاس اس حوالے سے ناقابلِ تردید شواہد موجود ہیں جو عالمی برادری کے سامنے پیش کیے جائیں گے۔ وزیرداخہ محسن نقوی pic.twitter.com/efe75zslkA
— The Thursday Times (@thursday_times) January 31, 2026
وزیر داخلہ نے کہا کہ دہشتگردوں نے پولیس یونٹس، فرنٹیئر کور کی تنصیبات، سرکاری دفاتر، تعلیمی اداروں اور شہری آبادیوں کو نشانہ بنانے کی منظم کوشش کی، تاہم سیکیورٹی فورسز اور قانون نافذ کرنے والے اداروں کی بروقت اور مؤثر کارروائیوں کے نتیجے میں تمام حملے ناکام بنا دیے گئے۔
محسن نقوی کا کہنا تھا کہ ان حملوں کی نوعیت، بیک وقت مختلف مقامات پر کارروائیاں اور دہشتگردوں کی منصوبہ بندی اس بات کا واضح ثبوت ہیں کہ یہ کارروائیاں مقامی نہیں بلکہ بیرونی سرپرستی کے تحت کی گئیں۔ انہوں نے کہا کہ پاکستان اپنی خودمختاری اور عوام کے تحفظ پر کوئی سمجھوتہ نہیں کرے گا اور دہشتگردی کے نیٹ ورکس کے خلاف کارروائیاں جاری رہیں گی۔
وزیر داخلہ نے سیکیورٹی فورسز کی قربانیوں کو خراجِ تحسین پیش کرتے ہوئے کہا کہ شہداء کی قربانیاں رائیگاں نہیں جائیں گی اور دہشتگردی کے خلاف جنگ منطقی انجام تک پہنچائی جائے گی۔ انہوں نے اس عزم کا اظہار کیا کہ پاکستان عالمی سطح پر بھارت کے کردار کو بے نقاب کرے گا اور بین الاقوامی برادری کو شواہد کے ساتھ آگاہ کیا جائے گا۔
