تہران (تھرسڈے ٹائمز) — ایرانی وزیرِ خارجہ عباس عراقچی نے امریکا و اسرائیل کے خلاف جنگ کے دوران ایران کی بھرپور حمایت پر پاکستانی حکومت اور عوام کا شکریہ ادا کیا ہے۔
ایران کے وزیرِ خارجہ عباس عراقچی نے سماجی رابطے کی ویب سائٹ ٹویٹر (ایکس) پر اردو زبان میں جاری کیے گئے اپنے پیغام میں امریکا و اسرائیل کے خلاف جنگ کے دوران پاکستان کی حکومت اور پاکستان کے عوام کی جانب سے ایران کیلئے بھرپور حمایت اور یکجہتی کے اظہار پر تہہ دل سے شکریہ ادا کیا ہے۔
ان بابرکت، الٰہی اور روحانی دنوں اور گھڑیوں میں،
میں حکومت اور عوامِ پاکستان کا تہہِ دل سے شکریہ ادا کرتا ہوں کہ انہوں نے امریکہ اور صہیونی رجیم کی جارحیت کے مقابلے میں عوام اور حکومتِ اسلامی جمہوریہ ایران کے ساتھ اپنی یکجہتی اور حمایت کا بھرپور اظہار کیا۔— Seyed Abbas Araghchi (@araghchi) March 16, 2026
عباس عراقچی نے لکھا ہے کہ میں پاکستان کی حکومت اور پاکستانی عوام کا تہہِ دل سے شکریہ ادا کرتا ہوں کہ اُنہوں نے امریکا اور صیہونی رجیم کی جارحیت کے مقابلہ میں ایرانی عوام اور حکومت کے ساتھ اپنی یکجہتی اور حمایت کا بھرپور اظہار کیا۔
ایرانی وزیرِ خارجہ عباس عراقچی نے اپنے پیغام میں مزید لکھا ہے کہ ایران اپنی حاکمیت اور علاقائی سالمیت کے دفاع کیلئے ثابت قدمی اور استقامت کے ساتھ کھڑا ہے۔
یاد رہے کہ 28 فروری کو امریکا و اسرائیل کی جانب سے ایران پر حملوں کا آغاز کیا گیا جس کے بعد یکم مارچ کو ایرانی سپریم لیڈر علی خامنہ ای کی ہلاکت کی خبر سامنے آئی، بعدازاں علی خامنہ ای کے بیٹے مجتبیٰ خامنہ ای کو ایران کا نیا سپریم لیڈر منتخب کر لیا گیا۔
واضح رہے کہ اِس بحران میں پاکستان قائدانہ کردار ادا کرتے ہوئے علاقائی سالمیت اور امن و استحکام کیلئے مؤثر سفارتی کردار ادا کر رہا ہے جس میں ایران پر امریکا و اسرائیل کے حملوں کی شدید مذمت اور خلیجی و عرب ممالک پر ایرانی حملوں کے خلاف واضح مؤقف شامل ہیں۔
