اسلام آباد (دی تھرسڈے ٹائمز) — وزیراعظم شہباز شریف نے سعودی عرب کے ولی عہد اور وزیراعظم شہزادہ محمد بن سلمان بن عبدالعزیز آل سعود سے ٹیلیفونک رابطہ کیا ہے، جس میں بحیرۂ احمر میں سعودی آئل ٹینکرز پر حوثی حملوں، علاقائی سلامتی اور سمندری تجارت کے تحفظ سے متعلق امور پر تبادلۂ خیال کیا گیا۔
وزیراعظم شہباز شریف نے سعودی آئل ٹینکرز کو نشانہ بنانے والے حوثی حملوں کی شدید ترین الفاظ میں مذمت کرتے ہوئے کہا کہ ایسے اقدامات ناقابلِ قبول، بین الاقوامی قانون کی صریح خلاف ورزی اور آزادانہ جہاز رانی کیلئے سنگین خطرہ ہیں۔
اُنہوں نے کہا کہ ان حملوں سے نہ صرف بحیرۂ احمر میں تجارتی سرگرمیاں متاثر ہونے کا خدشہ ہے بلکہ یہ اقدامات خطے کے امن، سلامتی اور استحکام کو بھی نقصان پہنچا سکتے ہیں۔
وزیراعظم نے سعودی عرب کے ساتھ پاکستان کی مکمل یکجہتی کا اعادہ کرتے ہوئے کہا کہ وہ، فیلڈ مارشل سید عاصم منیر اور پوری پاکستانی قوم اس نازک وقت میں سعودی قیادت اور برادر سعودی عوام کے ساتھ مضبوطی اور ثابت قدمی سے کھڑے ہیں۔
وزیراعظم شہباز شریف اور سعودی ولی عہد شہزادہ محمد بن سلمان نے خطے میں امن، سلامتی اور استحکام برقرار رکھنے کیلئے قریبی رابطے اور تعاون جاری رکھنے پر اتفاق کیا۔
دونوں رہنماؤں نے بحیرۂ احمر، آبنائے ہرمز اور وسیع تر خطے میں قانونی سمندری تجارت، آزادانہ جہاز رانی اور تجارتی بحری جہازوں کی بلا تعطل نقل و حرکت کو یقینی بنانے کیلئے مشترکہ کوششیں جاری رکھنے کے عزم کا بھی اظہار کیا۔
