WASHINGTON (The Thursday Times) — Peer, 16 November ko aik Amriki wafaqi judge ne Trump intezamia ki us policy ko kalaadam qarar de diya jis ke tehat ghair mulki talba aur sahafiyon ke America mein qiyam ki muddat par sakht pabandiyan lagayi jani thin.
Zili judge Dennis Saylor ne is policy ko “manmani, ghair maqool, sawabdeed ka ghalat istemal, aur ba soorat-e-deegar qanoon ke mutabiq nahin” qarar diya. Yeh qawaid September mein nafiz hone wale the lekin Saylor ne unhein arzi taur par rok diya tha, jis ke khilaf intezamia pehle hi aala adalat mein appeal kar chuki hai.
Yeh faisla jamiaat, asatiza, aur sahafiyon ki numainda ittehadi unions ki jaanib se Department of Homeland Security (DHS) ke khilaf dayer muqadme ka nateeja hai. Saylor ne zyada tar international talba par parne wale asraat par tawajjoh di. Unhon ne kaha, “Saaf alfaaz mein, DHS usi sargarmi ko rokna ya us ki hausla shikni karna chahta hai — yaani America mein ghair mulki talba ko taleemi mawaqe faraham karna — jis ki Congress ne ijazat aur hausla afzai karna chahi thi.”
Qawaid se kya hota
Student visa par aane wale ghair mulkiyon ko ziyada se ziyada chaar saal ke liye dakhla diya jata, jis ke baad unhein tawseeh ke liye darkhwast deni parti. Ab tak international talba apni taleem ki muddat tak reh sakte the. Judge ke mutabiq yeh policy talba ko PhD jaise taweel courses karne, mushtarka degrees hasil karne, aur apna taleemi shobah badalne se rok deti.
Ghair mulki sahafiyon ka qiyam 240 din, yaani taqreeban aath mah, tak mehdood hota, aur itni hi muddat ki tawseeh mil sakti thi, jabke ab tak woh paanch saal tak reh sakte the. Chini sahafiyon ko 90 din milte, aur 90 din ki tawseeh.
Yeh pabandiyan Sadar Donald Trump ki wasee tar immigration muhim ka hissa hain jis mein sakht mulk badri ki karrawaiyan aur qanooni taur par shehriyat ke raaston par nayi pabandiyan shamil hain. Sarkari aadad-o-shumar ke mutabiq America ne 2023-24 taleemi saal mein 11 lakh se zyada international talba ka khair maqdam kiya, jo kisi bhi doosre mulk se zyada hai. Is hafte ke awail mein shaya hone wale aik survey mein maloom hua ke is khizan mein international talba ke dakhle 9 fisad kam hue.



