اسلام آباد (تھرسڈے ٹائمز) — پاکستان اسٹاک مارکیٹ میں تیزی کا سلسلہ جاری ہے، اور بینچ مارک ہنڈرڈ انڈیکس نے تاریخ میں پہلی مرتبہ 97,000 پوائنٹس کی سطح کو چھو لیا ہے۔
کاروباری ہفتے کے تیسرے روز پاکستان اسٹاک مارکیٹ میں نمایاں اضافہ دیکھنے میں آیا ہے، جس میں بینچ مارک ہنڈرڈ انڈیکس 1501 پوائنٹس کے اضافے کے ساتھ 97,000 کی سطح پر پہنچ گیا ہے۔ یہ 1.41 فیصد اضافے کو ظاہر کرتا ہے۔ دن کے دوران انڈیکس کی بلند ترین سطح 97,000 سے زائد رہی، جبکہ کم ترین سطح 95,300.21 پوائنٹس پر ریکارڈ کی گئی۔ اس دن تقریباً 164,203,590 حصص کا کاروبار ہوا، جس کی کل مالی قدر 10,534,337,125 روپے رہی۔
پاکستان اسٹاک مارکیٹ میں اس شاندار اضافے سے سرمایہ کاروں کا اعتماد ملکی معیشت پر مزید مضبوط ہوا ہے۔ ماہرین کا کہنا ہے کہ یہ اضافہ حکومتی پالیسیوں اور معاشی استحکام کے عزم کا نتیجہ ہے، جو نہ صرف مارکیٹ کو استحکام فراہم کر رہا ہے بلکہ ملکی معیشت کے لیے بھی ایک مثبت اشارہ ہے۔ سرمایہ کاروں کی مسلسل دلچسپی اور مارکیٹ میں بڑھتی ہوئی سرگرمیاں معیشت کی بحالی کے امکانات کو بھی تقویت دے رہی ہیں۔
