WASHINGTON (The Thursday Times) — Muhaqqiqeen ke mutabiq Bharat se post karne wale social media accounts ne Michigan ke Democratic Senate primary mein Abdul El-Sayed ki harif Haley Stevens ki himayat mein videos phailayin, jabke yeh muqabla jeetne ke baad aik hafte mein El-Sayed ko nishana banane wali Muslim mukhalif posts bees guna barh gayin.
Ghalat maloomat par tehqeeq karne wale gumnam group Antibot4Navalny ne X par kam az kam 28 aise accounts ki nishandahi ki jinhon ne 4 August ke primary se pehle Stevens ki himayat mein videos chhup kar post kin, jinhein 70 lakh se zaid baar dekha gaya. Accounts ke jaize se maloom hua ke in mein se kam az kam 15 Bharat se post kar rahe thay. Clemson University ke Media Forensic Hub ke muhaqqiqeen ne bhi El-Sayed ke muqable mein Stevens ki himayat ke liye kiraye ke Bharti accounts aur pages ko isi tarah ke harbe istemal karte paya. In posts ki adaigi kis ne ki, yeh abhi tak wazeh nahin ho saka.
Yeh accounts aik wasee tar karobar ka hissa hain. Bharti siyasi musheer bairoon-e-mulk “khufiya” muhimat farokht karne ka aitraf kar chuke hain, jin mein aise pages chalaye jate hain jo yeh chhupate hain ke un ke peechhe kaun hai, Kenya ke 2022 ke sadarti intikhab se le kar Africa aur Junoobi America ke intikhabat tak. Aik content creator ne bataya ke use aise pages ke liye posts banane ke taqreeban 7 dollar rozana milte thay. Online gardish karne wale yeh dawe ke Michigan mein yeh accounts Hindu qaum parast networks chala rahe thay, ab tak shaya hone wali tehqeeq se sabit nahin hote, jo inhein paise dene wale gahakon ko tawajjuh farokht karne wale tijarati operators qarar deti hai.
Nafrat angez muhim: El-Sayed, jo Mangal ko Amrici Senate ke liye muntakhib hone wale pehle Musalman bane, online kahin bari Muslim mukhalif muhim ka samna karte rahe. Washington mein qaim tehqeeqi group Center for the Study of Organized Hate ne 1 January se 10 August ke dauran X, Facebook, Instagram, YouTube, Reddit aur Bluesky par un ka naam lene wali 38,280 Islamophobic posts ka tajzia kiya.
1 June se 3 August tak unhein nishana banane wali posts ki ausat 155 rozana thi, jo 4 se 10 August ke darmiyan barh kar 3,099 rozana ho gayi, yani 1,895 feesad izafa. Sirf is aik hafte mein 21,690 posts samne ayin, jo saal bhar ki majmooi tadaad ke nisf se zyada hain, aur 5 August ko, jis din Stevens ne shikast tasleem ki, yeh tadaad 6,923 ki buland tareen satah par pahunch gayi.
Sab se aam mauzoaat mein unhein Hamas, Hezbollah aur Ikhwan-ul-Muslimeen se jorne ke jhoote dawe, un ke Shariat nafiz karne ke dawe aur “remigration” yani Musalmanon ko bare paimane par nikalne ke mutalbat shamil thay. Group ke mutabiq guzishta saal New York ke mayor ke liye Zohran Mamdani ki intikhabi muhim mein bhi yahi rujhan dekha gaya tha, aur jab bhi koi Musalman ummeedwar mazboot hota hai yeh muhim sargaram ho jati hai.
Siyasatdanon ne bhi is mahol ko hawa di. Sadar Donald Trump ne intikhabi muhim ke dauran baarha El-Sayed ko “jihadi” kaha. Is saal ke aaghaz mein isi tehqeeqi group ne aise 89 muntakhib uhdedaron ki nishandahi ki thi jinhon ne 13 mahine mein 1,111 Muslim mukhalif social media posts kin, aath bill pesh kiye aur “Sharia-Free America Caucus” banaya jis ke arkan ki tadaad 65 tak pahunch gayi. Khud Stevens ne voting se do din pehle El-Sayed ke Republican harif Mike Rogers ki himayat kar di thi. El-Sayed ne Rogers ko shikast di.
