اوکاڑہ (تھرسڈے ٹائمز) — پاکستان مسلم لیگ (ن) کی چیف آرگنائزر مریم نواز شریف نے عام انتخابات کے سلسلہ میں عوامی رابطہ مہم کا آغاز کر دیا ہے، انہوں نے آج اوکاڑہ میں مسلم لیگ (ن) کے راہنما ریاض الحق جج کے ہمراہ انتخابی جلسہ سے خطاب کرتے ہوئے کہا ہے کہ نواز شریف کی چار سالوں بعد وطن واپسی کا سہرا پاکستان کے عوام کو جاتا ہے۔
مریم نواز شریف نے کہا کہ نواز شریف کا ایک ایک دشمن اپنے اصل انجام کو پہنچ رہا ہے، یہ انتقام ان سے نواز شریف اور مسلم لیگ (ن) نہیں لے رہے بلکہ قدرت لے رہی ہے، قدرت کی عدالت نے نواز شریف اور پاکستان کے ساتھ ہونے والے مظالم پر سو موٹو ایکشن لے لیا ہے جبکہ دشمن جوتیاں چھوڑ کر فرار ہو رہے ہیں، اللّٰه کی لاٹھی بےآواز ہوتی ہے اور یہ لاٹھی اب پاکستان کے دشمنوں پر برس رہی ہے۔
مسلم لیگ (ن) کی سینیئر نائب صدر کا کہنا تھا کہ کچھ لوگ دوسروں کا احتساب کرتے ہوئے طاقت کے بل بوتے پر فرعون بنے پھرتے تھے لیکن آج اپنی باری آئی تو فرار ہو رہے ہیں جبکہ نواز شریف جیسا دلیر میدان میں کھڑا رہا، نواز شریف نے کبھی منہ نہیں چھپایا کیونکہ نواز شریف نے کوئی چوری نہیں کی، جس نے چوری کی تھی وہ منہ چھپا کر، منہ پر بالٹی ڈال کر اور وہیل چیئر پر بیٹھ کر آیا کرتا تھا۔
چیف آرگنائزر مسلم لیگ (ن) نے کہا کہ لوگوں کی ماؤں بہنوں بیٹیوں کو جیلوں میں قید کرنے والے بزدلوں کی اپنی باری آئی تو ذلت کے ساتھ فرار ہو رہے ہیں، قدرت کا اصول ہے کہ گناہگار کی معافی ہے مگر ظالم کی معافی نہیں ہے، آج ظالم عدالتوں میں جوتیاں چھوڑ کر فرار ہو رہے ہیں، انہیں سہولت کاری کی عادت ہو گئی تھی مگر اب وہ سہولت کاریاں نہیں رہیں، وہ سہولت کاری رہی نہ وہ سہولت کار رہے۔
مریم نواز شریف نے تحریکِ انصاف کو آڑے ہاتھوں لیتے ہوئے کہا کہ اپنے وکلاء کو سمجھائیں کہ تیاری کر کے عدالت جایا کریں کیونکہ وہاں اب ساس سے فون کال کروا کر فیصلے لینے کی سہولت میسر نہیں ہے، اب فیصلے عوام کریں گے اور عدالت میں آئین کے مطابق فیصلے ہوں گے، دنیا نے قاضی فائز عیسیٰ کی عدالت میں دیکھ لیا کہ عدالت ثبوت مانگتی رہی لیکن ان کے پاس کوئی بھی ثبوت نہیں تھا۔
ان کا کہنا تھا کہ عدالت نے امیدواروں کی فیس کی رسیدیں مانگیں مگر ان کے پاس کوئی رسید نہیں تھی، ان کے پاس کوئی رسید ہوتی تو دکھاتے، یہ چاہتے ہیں کہ جعل سازی کریں اور پھر ٹیلی ویژن پر پوری دنیا کے سامنے بےنقاب ہو جائی تو ان کو کچھ نہ کہا جائے، اب وہ سہولت میسر نہیں کہ آر ٹی ایس کا بٹن دبا کر آپ دھاندلی سے جیت جائیں، اب آپ کو اپنے کیے کا انجام بھگتنا ہو گا۔
چیف آرگنائزر مسلم لیگ (ن) نے کہا کہ چور چوری سے جاتا ہے مگر پیرا پھیری سے نہیں جاتا اسی لیے انہوں نے انٹرا پارٹی الیکشن میں بھی ہیر پھیر کیا، اب شور برپا ہے کہ ہمارا انتخابی نشان واپس لے لیا گیا ہے، کون سا انتخابی نشان؟ تمہارا انتخابی نشان تو وہ ڈنڈا تھا جو تم نے ریاست پر چلایا، عوام پر چلایا، پولیس اہلکاروں پر حملے کیے اور انہی زخمی کیا لیکن اب وہ ڈنڈا تمہارے ہاتھ سے چھین لیا گیا ہے۔
مریم نواز شریف کا کہنا تھا کہ پوری قوم نے دیکھا کہ تم نے اس ڈنڈے سے شہداء کی یادگاروں کو نقصان پہنچایا، ریاستی املاک پر حملے کیے، دفاعی تنصیبات پر ڈنڈے برسائے، آج آپ کو ڈنڈا یا پیٹرول بم کا انتخابی نشان ملنا چاہیے، آج آپ کو وہ گھڑی کا انتخابی نشان ملنا چاہیے جو آپ نے چوری کی تھی، ایک شیر کو شیر کا انتخابی نشان ہی ملنا چاہیے لیکن ایک دہشتگرد کو بلے کا نشان نہیں ملنا چاہیے۔
مسلم لیگ (ن) کی سینیئر نائب صدر نے کہا کہ نواز شریف کے دورِ حکومت میں آپ کو سستی روٹی، سستہ چینی، سستی بجلی، سستی گیس، سستی تعلیم، سستی دوائی اور سستی سبزیاں ملتی تھی مگر ظالموں نے 2018 میں عوام سے یہ سب سہولیات چھین لیں، فتنہ کہتا ہے کہ نواز شریف کو ایمپائر ساتھ ملا کر کھیلنے کی عادت ہے، جان لو کہ نواز شریف کے ایمپائرز عوام ہیں، نواز شریف کو جتنی بار نکالا گیا یہی ایمپائرز نواز شریف کو واپس لائے اور اب چوتھی بار بھی انشاءاللّٰه یہی عوام واپس لائیں گے مگر تم نے جن ایمپائرز کو ساتھ ملا کر پاکستان پر ظلم کیا تھا وہ بھی تمہارے ساتھ پکڑے گئے ہیں۔
ان کا کہنا تھا کہ 8 فروری کو الیکشن آ رہا ہے، آپ نے نہ صرف نواز شریف کو ووٹ دینا ہے بلکہ نواز شریف کو ایک مضبوط حکومت بھی دینی ہے، اگر کوئی پاکستان سے محبت کرتا ہے، اگر کوئی اس سرزمین سے محبت کرتا ہے، اگر کوئی اس مٹی سے محبت کرتا ہے، اگر کوئی اس وطن سے محبت کرتا ہے تو وہ نواز شریف کے علاوہ کسی اور کو ووٹ دے ہی نہیں سکتا ہے۔
مریم نواز شریف نے کہا کہ جتنے زیادہ ووٹ نواز شریف کو ملیں گے، اتنی ہی تیزی سے مہنگائی کم ہو گی، اتنی ہی تیزی سے بجلی کے بل کم ہوں گے، اتنی ہی تیزی سے گیس ملے گی، اتنی ہی اچھی تعلیم ملے گی اور اتنی ہی سستی دوائی میسر ہو گی، ہمیں انتقام کی فکر نہیں بلکہ ہمیں غریب عوام کے چولہے جلانے کی فکر ہے، انشاءاللّٰه ہر ضلع میں دانش سکول ہو گا، ہر علاقہ میں صحت کے مراکز ہوں گے۔
چیف آرگنائزر مسلم لیگ (ن) کا کہنا تھا کہ آج جب میں گھر سے نکل رہی تھی تو نواز شریف ایک اہم میٹنگ میں مصروف تھے کہ بجلی کے بل کیسے کم کیے جا سکتے ہیں، بجلی سستی کیسے کی جا سکتی ہے، عوام کو سستا آٹا اور سستی چینی کیسے فراہم کی جا سکتی ہے، سستی دوائی کی فراہمی کیسے ہو سکتی ہے اور کیسے نوجوانوں کیلئے روزگار کے راستے کھولنے ہیں، نواز شریف عوام کی فلاح اور ترقی و خوشحالی کی فکر میں ہیں، ہمیں کسان کی فکر ہے کہ کیسے سستا ٹیوب ویل چلانا ہے اور کیسے کسانوں کیلئے اچھی سڑکیں فراہم کرنی ہیں۔
انہوں نے اوکاڑہ میں مسلم لیگ (ن) کے امیدوار ریاض الحق جج کو جماعت کا مخلص اور باوفا ساتھی قرار دیتے ہوئے کہا کہ انہوں نے مشکل وقت میں پارٹی کا ساتھ دیا ہے اور آپ نے اپنے ووٹ کی طاقت سے انہیں فتح دلائی ہے، میرا مقصد نوجوان نسل کی فلاح ہے، یوتھ کیلئے اچھی تعلیم اور اچھے روزگار کی فراہمی ہے، ہمیں انفارمیشن ٹیکنالوجی میں آگے بڑھنا ہو گا۔
مریم نواز شریف نے کہا کہ نواز شریف کو ووٹ دے کر پاکستان کو صحت سے نواز دو، نواز شریف کو ووٹ دے کر پاکستان کو تعلیم سے نواز دو، نواز شریف کو ووٹ دے کر پاکستان کو ترقی و خوشحالی سے نواز دو، نواز شریف کو ووٹ دے کر پاکستان کو سستی بجلی اور سستی گیس سے نواز دو، نواز شریف کو ووٹ دے کر پاکستان کو امن سے نواز دو، شیر پر مہر لگاؤ اور پاکستان کو نواز دو۔
