اسلام آباد (تھرسڈے ٹائمز) — وزیراعظم شہباز شریف نے کہا ہے کہ پاکستان کو ترقی و خوشحالی کی بلندیوں پر پہنچانا ہے تو دن رات محنت کرنا ہو گی، حکومت سنبھالتے ہی ترقیاتی منصوبوں پر 24 گھنٹے کام کرنے کی ہدایات جاری کی تھیں، آئی ٹی پارک کی تعمیر میں تعاون پر جنوبی کوریا کی حکومت کا شکریہ ادا کرتے ہیں۔
وزیراعظم شہباز شریف نے اسلام آباد میں زیرِ تعمیر ٹیکنالوجی پارک کا دورہ کیا ہے جہاں انہوں نے تعمیراتی کام کی پیش رفت کا جائزہ لیا ہے جبکہ وزیراعظم شہباز شریف نے اسلام آباد انفارمیشن ٹیکنالوجی پارک کی تعمیر میں تعاون پر جنوبی کوریا کی حکومت کا شکریہ بھی ادا کیا ہے۔
اس موقع پر وزیراعظم شہباز شریف نے خطاب کرتے ہوئے کہا ہے کہ انفارمیشن ٹیکنالوجی (آئی ٹی) پارک کے ذریعہ 10 ہزار ملازمتوں کے مواقع پیدا ہوں گے، آئی ٹی پارک پر لاگت کا تخمینہ 25 ارب روپے ہے، سہولتوں کے لحاظ سے یہ جدید ترین آئی ٹی پارک ہو گا، آئی ٹی پارک کی تعمیر میں تعاون پر جنوبی کوریا کی حکومت کا شکریہ ادا کرتے ہیں۔
وزیراعظم شہباز شریف کا کہنا تھا کہ اسلام آباد ٹیکنالوجی پارک پاکستان کا بین الاقوامی معیار کے مطابق پہلا کیٹیگری 3 کا ٹیکنالوجی پارک ہو گا، آئی ٹی پارک اس خطے میں رول ماڈل ہو گا، آئی ٹی پارک میں 120 دفاتر ہوں گے، آئی ٹی پارک میں بزنس سپورٹ سینٹر بھی قائم ہو گا جبکہ پارک کا تعلیمی اداروں اور ماہرین کے ساتھ قریبی رابطہ ہو گا، آئی ٹی پارک میں ریسٹ ہاؤس بھی تعمیر کیا جائے گا۔
شہباز شریف نے کہا ہے کہ حکومت سنبھالتے ہی ترقیاتی منصوبوں پر 24 گھنٹے کام کرنے کی ہدایات جاری کی تھیں، پنجاب میں ترقیاتی منصوبوں پر 24 گھنٹے تعمیراتی کام کرنے کا نظام متعارف کروایا تھا، خوش آئند بات ہے کہ اس منصوبے کی جلد ازجلد تکمیل کیلئے 24 گھنٹے کام جاری ہے۔
وزیراعظم کا مزید کہنا تھا کہ پاکستان کو ترقی و خوشحالی کی بلندیوں پر پہنچانا ہے تو دن رات محنت کرنا ہو گی، بذاتِ خود ہفتہ اور اتوار کی چھٹی کو ترک کر دیا ہے، پروجیکٹ ٹیم اور وزارتِ آئی ٹی منصوبے کو جلد مکمل کرنے کیلئے اقدامات کی رفتار تیز کریں۔∎
