کراچی (تھرسڈے ٹائمز) — پاکستان سٹاک مارکیٹ میں تیزی کا رجحان، بینچ مارک ہنڈرڈ انڈیکس میں 3900 سے زائد پوائنٹس کا اضافہ، سٹاک ایکسچینج ایک بار پھر 115000 کی سطح عبور کر گیا۔
کاروباری ہفتہ کے پہلے روز پاکستان سٹاک مارکیٹ میں آغاز سے ہی زبردست تیزی کا رجحان برقرار رہا، بینچ مارک ہنڈرڈ انڈیکس میں ایک موقع پر 4071 سے زائد پوائنٹس اضافہ کے ساتھ سٹاک ایکسچینج 1 لاکھ 15 ہزار 422 اعشاریہ 34 کی سطح تک پہنچ گیا۔
گزشتہ کاروباری ہفتہ کے اختتام پر 1 لاکھ 11 ہزار 351 اعشاریہ 17 پوائنٹس پر بند ہونے والا سٹاک ایکسچینج آج مجموعی طور پر ہنڈرڈ انڈیکس میں 3 ہزار 907 اعشاریہ 82 پوائنٹس (تقریباً 3 اعشاریہ 51 فیصد) کے نمایاں اضافہ کے ساتھ 1 لاکھ 15 ہزار 258 اعشاریہ 99 پوائنٹس پر بند ہوا ہے۔
تجارتی حجم کو دیکھا جائے تو 1 ارب 5 کروڑ 90 لاکھ 20 ہزار 119 سے زائد حصص کا تبادلہ ہو چکا ہے جبکہ تجارتی مالیت 40 ارب 88 کروڑ 93 لاکھ 96 ہزار 718 روپے سے زائد رہی ہے۔
