گوجرانوالہ (تھرسڈے ٹائمز) — انسدادِ دہشتگردی کی خصوصی عدالت نے گوجرانوالہ میں سانحہ 9 مئی کے حملوں میں ملوث 51 ملزمان کو پانچ، پانچ سال قید کی سزائیں سنا دی ہیں۔
گوجرانوالہ میں انسدادِ دہشتگردی کی خصوصی عدالت نے 9 مئی 2023 کو راہوالی کینٹ چیک پوسٹ پر حملہ کے مقدمہ میں مختصر فیصلہ سنا دیا ہے جس کے مطابق پنجاب اسمبلی کے رکن کلیم اللّٰہ خان سمیت 51 ملزمان کو مجرم قرار دیتے ہوئے مختلف دفعات کے تحت قید بامشقت کی سزائیں سنا دی گئی ہیں۔
انسدادِ دہشتگردی کی خصوصی عدالت کی جج مسز نتاشہ نسیم نے راہوالی کینٹ چیک پوسٹ پر حملہ کے مقدمہ مین سماعت مکمل ہونے پر مختصر فیصلہ سنا دیا ہے جبکہ تفصیلی فیصلہ بعد میں سنایا جائے گا، ملزمان کا ٹرائل سینٹرل جیل گوجرانوالہ میں کیا گیا جبکہ فیصلہ بھی جیل کے کورٹ روم میں ہی سنایا گیا ہے۔
آرمی چیک پوسٹ راہوالی کینٹ اور پاکستانی فوج و پولیس اہلکاروں پر حملوں کا مقدمہ 10 مئی 2023 کو درج کیا گیا تھا جس میں ناجائز اسلحہ، قتل اور دہشتگردی کی دفعات شامل کی گئیں، مقدمہ کے مدعی ایس ایچ او مدثر رفیق بٹ ہیں جبکہ مقدمہ میں رکنِ پنجاب اسمبلی کلیم اللّٰہ خان، تحریکِ انصاف کی مقامی قیادت جمال ناصر چیمہ، رضوان ظفر چیمہ، رضوان مصطفٰی سیان اور سابق رکنِ پنجاب اسمبلی شبیر مہر سمیت 23 نامزد اور 400 نامعلوم افراد ملزم تھے جبکہ کچھ ملزمان کو بعدازاں شناخت ہونے پر نامزد کیا گیا۔
یاد رہے کہ سانحہ 9 مئی کے حملوں میں راہوالی چیک پوسٹ کے قریب پولیس رضا کار راشد مقبول جاں بحق ہوا تھا جبکہ ایس ایس پی انویسٹیگیشن، ڈی ایس پی اور ایس ایچ او سمیت 8 افسران و اہلکار زخمی ہوئے تھے جبکہ سرکاری گاڑیوں کی توڑ پھوڑ بھی کی گئی تھی۔
