مری (تھرسڈے ٹائمز) — وزیراعلی پنجاب مریم نواز نے پنجاب کو جرائم اور کرپشن فری صوبہ بنانے کے لئے اصلاحات کا گرینڈ پیکج تیار کرلیا ہے۔ جبکہ پولیس، پراسیکیوشن اور عدالتی نظام کی جامع اصلاحات کے لئے تاریخی قانونی سازی کا بل منظور کرانے کا فیصلہ کرلیا گیا ہے۔ یہ فیصلہ وزیر اعلیٰ پنجاب مریم نواز شریف کی زیر صدارت مری میں خصوصی اجلاس میں کیا گیا۔
اجلاس میں فیصلہ کیا گیا کہ عورتوں اور بچوں سے زیادتی کا جرم ناقابل ضمانت جرم ہو گا اور اسکے لیے وزیراعلی مریم نواز نے قانون سازی کے لئے تجاویز کی فوری تیاری کی ہدایت فوری اور جلد سزا دلانے کے لئے سپیڈی ٹرائل کورٹس بنانے کا فیصلہ کیا ہے۔
اجلاس میں پنجاب کے پراسیکیوشن محکمہ کی مکمل اوورہالنگ اور پولیس کو کرپشن اورجرائم پیشہ عناصر کے مددگاروں سے پاک کرنے کا بھی فیصلہ کیا گیا۔ اجلاس میں فیصلہ کیا گیا کہ پولیس افسران اور اہلکاروں کی پیشہ وارانہ قابلیت اور کارکردگی کی جانچ کے لئے سپیشل آڈٹ سسٹم کا نفاذ ہوگا۔
وزیراعلی پنجاب مریم نواز کی زیر صدارت فیصلہ کیا گیا کہمعیاری پولیسنگ، پراسیکیوشن اورمقدمات کی رفتار تیز بنانے کے لئے جدید ٹیکنالوجی استعمال ہوگی جہاں پر شہری جدید آئی ٹی ڈیش بورڈ کے ذریعے رشوت مانگنے والے کی شکایت کرسکیں گے، شکایت کرنے والے کی معلومات خفیہ رکھی جائیں گی۔
مریم نواز نے ہر جرم کے لئے الگ سپیشل فورس بنانے، پولیس میں کرپشن کے خاتمے،صوبے میں بجلی چوری اور سمگلنگ کے تدارک کے لئے کریک ڈاﺅن کی رفتار تیز کرنے کی ہدایت بھی کی۔ جبکہ آرگنائزڈ اور سائبر کرائم کے خاتمے کے لئے سپیشل یونٹ کے قیام اور آئی ٹی ٹریننگ کا اصولی فیصلہ بھی کیا گیا۔
اجلاس میں سمگلنگ روکنے کے لئے نئی سرحدی فورس بنانے کی تجویز پر بھی غور کیا گیا جبکہ منشیات کے خاتمے کےلئے مہم مسلسل جاری رکھنے کی منظوری بھی دی گئی۔ پنجاب میں ناجائز اسلحہ کلچر کے خاتمے کے لئے سخت اقدامات لینے کیساتھ ساتھ نئے اسلحہ لائسنس کے اجرا پر پابندی لگادی گئی۔
مریم نواز کی زیر صدارت اجلاس میں پنجاب میں ہرطرح کے مسلح گینگز کے خلاف آپریشن کلین اپ کا بھی فیصلہ کیا گیا۔ جبکہ وزیراعلی پنجاب کی جانب سے پنجاب کے قبائلی علاقوں میں سماجی بہبود اور ترقی کا پیکج بھی تیار کرنے کی ہدایات جاری کی گئیں۔
اجلاس میں پتنگ بازی اور دھاتی تار کے استعمال کے سدباب کے لئے مزید فول پروف انتظامات کرنے کی ہدایات بھی جاری کی گئیں اور فیصلہ کیا گیا کہ جامع اصلاحات ، سخت اور فوری سزاوں سے ہی جرائم میں کمی یقنی بنائی جاسکتی ہے۔
اس موقع پر وزیراعلی مریم نواز نے بچوں اور عورتوں سے زیادتی کے مجرموں کو عبرت کا نشان بنانے کا بھی عزم کیا۔ مریم نواز نے کہا کہ ہر شہری کی عزت وآبرو، جان ومال کا تحفظ اور خدمت حکومت کی بنیادی زمہ داری ہے۔
مریم نواز نے کہا کہ پولیس کو جدید اسلحہ، آلات، گاڑیاں، نائٹ ویژن اور ڈرون فراہم کی جائینگی۔ جبکہ آرٹیفیشل انٹیلیجنس (اے آئی ) اور تھرمل امیجنگ جیسی جدید ٹیکنالوجی بھی استعمال کی جائے گی۔
مریم نواز نے ہدایات جاری کیں کہ پنجاب کو دہشت گردی ، سمگلنگ اورجرائم پیشہ گینگز سے پاک کیاجائے۔ مریم نواز نے مزید کہا کہ پراسکیوشن اور انوسٹی گیشن نظام میں بہتری لائے بغیر جرم ختم نہیں ہوگا۔
مریم نواز شریف کی زیرصدارت اجلاس میں صوبے میں امن و امان کی صورتحال کا تفصیلی جائزہ لیا گیا انسپکٹر جنرل پولیس پنجاب نے امن امان کی مجموعی صورت حال پر بریفنگ دی۔ اجلاس میں سینئر وزیر مریم اورنگزیب ، چیف سیکرٹری، ہوم سیکرٹری، اے آئی جی، کمشنر ، سی سی پی او، ار پی او سمیت اعلی شریک ہوئے۔
