اسلام آباد (تھرسڈے ٹائمز) — (پی ایس ایکس) میں بدھ کو سرمایہ کاروں کی بھرپور دلچسپی کے باعث زبردست تیزی دیکھنے میں آئی، جس کے نتیجے میں کے ایس ای 100 انڈیکس 932.75 پوائنٹس اضافے کے ساتھ 118,000 پوائنٹس کی نفسیاتی سطح عبور کر گیا۔ کاروباری دن کے دوران انڈیکس نے 117,977.56 پوائنٹس کی بلند ترین سطح جبکہ کم ترین سطح 116,882.80 پوائنٹس ریکارڈ کی۔
تفصیلات کے مطابق کاروباری دن کے آغاز سے ہی سرمایہ کاروں کی جانب سے بینکاری، توانائی اور سیمنٹ کے شعبوں میں نمایاں خریداری دیکھنے میں آئی جس سے مارکیٹ میں مثبت رجحان رہا۔ مجموعی طور پر 28 کروڑ 23 لاکھ 65 ہزار 95 حصص کا کاروبار ہوا جن کی مالیت 23 ارب 5 کروڑ 54 لاکھ 80 ہزار 55 روپے رہی۔
گزشتہ روز مارکیٹ 117,001.09 پوائنٹس پر بند ہوئی تھی، تاہم آج سرمایہ کاروں کے بڑھتے اعتماد اور معاشی استحکام کی توقعات کے باعث انڈیکس میں 0.8 فیصد اضافہ ہوا۔ معاشی ماہرین کے مطابق انڈیکس کا 118,000 پوائنٹس کی سطح عبور کرنا سرمایہ کاروں کے اعتماد میں نمایاں اضافے کی واضح علامت ہے۔
تجزیہ کاروں کا کہنا ہے کہ حالیہ معاشی اصلاحات اور بین الاقوامی مالیاتی اداروں کی جانب سے پاکستان کو فراہم کردہ مثبت اشاروں نے بھی سرمایہ کاروں کے اعتماد کو بحال کیا ہے۔ اس کے علاوہ رواں ہفتے سرمایہ کاروں کی توجہ آئندہ معاشی پالیسیوں اور حکومت کے مالیاتی اقدامات پر مرکوز رہے گی۔
