اسلام آباد — پاکستان کی جانب سے ایران کے صوبہ سیستان میں دہشتگردوں کے خلاف کارروائی، انٹیلیجنس بنیاد پر شروع کیے گئے آپریشن “مرگ بر سرمچار” میں متعدد دہشتگرد مارے گئے ہیں۔
پاکستانی دفترِ خارجہ کی ترجمان کی جانب سے جاری کیے گئے بیان میں کہا گیا ہے کہ آج صبح پاکستان نے ایران کے صوبہ سیستان و بلوچستان میں دہشتگردوں کے ٹھکانوں کے خلاف انتہائی مربوط اور خاص ٹارگٹڈ فوجی حملوں کے سلسلہ کا آغاز کر دیا ہے، انٹیلیجنس بنیاد پر شروع کیے گئے آپریشن میں متعدد دہشتگرد مارے گئے ہیں جبکہ آپریشن کا نام “مرگ بر سرمچار” رکھا گیا ہے۔
بیان میں کہا گیا ہے کہ گزشتہ کئی سالوں کے دوران ایران کے ساتھ مصروفیات میں پاکستان نے ایران کے اندر غیر حکومتی مقامات پر خود کو “سرمچار” کہنے والے پاکستانی نژاد دہشتگردوں کی محفوظ پناہ گاہوں اور ٹھکانوں کے بارے میں اپنی سنگین تشویش کا مسلسل اظہار کیا ہے، پاکستان نے ان دہشتگردوں کی موجودگی اور سرگرمیوں کے ٹھوس شواہد کے ساتھ متعدد فائلز بھی شیئر کی ہیں تاہم ہمارے سنگین خدشات پر ایکشن نہ ہونے کے باعث یہ نام نہاد سرمچار بےگناہ پاکستانیوں کا خون بہاتے رہے۔
ترجمان دفترِ خارجہ کی جانب سے جاری کیے گئے بیان کے مطابق آج صبح کی کارروائی ان نام نہاد سرمچاروں کی طرف سے بڑے پیمانے پر دہشتگردانہ کارروائیوں کے بارے میں مصدقہ انٹیلیجنس معلومات کی روشنی میں کی گئی، یہ کارروائی قومی سلامتی کو تمام خطرات سے محفوظ رکھنے اور دفاع کے غیرمتزلزل عزم کا مظہر ہے، اس انتہائی پیچیدہ آپریشن کا کامیاب انعقاد بھی پاکستان کی مسلح افواج کی پیشہ ورانہ مہارت کا منہ بولتا ثبوت ہے، پاکستان اپنے عوام کے تحفظ اور سلامتی کیلئے تمام ضروری اقدامات کرتا رہے گا جو کہ مقدس، ناقابلِ تسخیر اور ذی حیثیت ہے۔
بیان میں کہا گیا ہے کہ پاکستان ایران کی خودمختاری اور علاقائی سالمیت کا مکمل احترام کرتا ہے، آج کیے گئے ایکٹ کا واحد مقصد پاکستان کی اپنی سلامتی اور قومی مفاد کا حصول تھا جو کہ سب سے زیادہ اہم ہے اور اس پر کوئی سمجھوتا نہیں کیا جا سکتا، بین الاقوامی برادری کے ایک ذمہ دار رکن کی حیثیت سے پاکستان اقوامِ متحدہ کے چارٹر کے اصول اور مقاصد کو برقرار رکھتا ہے جس میں رکن ممالک کی علاقائی سالمیت اور خودمختاری شامل ہے۔
پاکستانی دفترِ خارجہ کی جانب سے جاری بیان میں کہا گیا ہے کہ پاکستان ان اصولوں کی راہنمائی میں اور بین الاقوامی قانون کے تحت اپنے جائز حقوق کو بروئے کار لاتے ہوئے کبھی اپنی خودمختاری اور علاقائی سالمیت کو کسی بھی بہانے یا حالات میں چیلنج کرنے کی اجازت نہیں دے گا، ایران ایک برادر ملک ہے اور پاکستانی عوام ایرانی عوام کیلئے بہت عزت اور محبت رکھتے ہیں، ہم نے ہمیشہ دہشتگردی کی لعنت سمیت مشترکہ چیلنجز کا مقابلہ کرنے کیلئے بات چیت اور تعاون پر زور دیا ہے اور مشترکہ حل تلاش کرنے کی کوشش جاری رکھیں گے۔
