لاہور (تھرسڈے ٹائمز) — وزیراعلیٰ پنجاب مریم نواز نے ٹیکسلا اور سندر لیبر کالونیوں میں مزدوروں کے لیے 1224 مفت فلیٹس فراہم کرنے کا اعلان کیا ہے۔ یہ اعلان انہوں نے ایک اجلاس کی صدارت کرتے ہوئے کیا، جس میں محکمہ لیبر کی کارکردگی کا جائزہ لیا گیا۔
اجلاس کے دوران انکشاف ہوا کہ گزشتہ دور حکومت میں 29 ہزار مزدوروں کو موت اور شادی گرانٹ نہیں دی گئی تھی۔ اس پر، مریم نواز نے 6 ارب روپے کے واجبات ادا کرنے کا حکم دیا تاکہ ان مزدوروں کو ان کی واجب الادا رقم دی جا سکے۔
مزید برآں، وزیراعلیٰ نے گارمنٹ سٹی میں خواتین مزدوروں کے لیے دو ہاسٹلز بنانے کی منظوری دی اور شیخوپورہ میں 704 خواتین مزدوروں کے لیے مفت رہائش فراہم کرنے کا فیصلہ بھی کیا۔ انہوں نے محکمہ لیبر میں اصلاحات، حفاظتی اور صحتی قوانین پر عملدرآمد اور کم از کم اجرت کے قوانین کے نفاذ کا بھی حکم دیا۔
اجلاس میں گفتگو کرتے ہوئے مریم نواز نے کہا کہ پنجاب کے ہر مزدور کے حقوق کا تحفظ ہماری ذمہ داری ہے۔ پنجاب حکومت نے رواں بجٹ میں کم از کم اجرت 37 ہزار روپے مقرر کی ہے اور تمام اسٹیک ہولڈرز کو اعتماد میں لے کر اس اجرت کو نافذ کرنے کی ہدایت کی ہے۔
