پشاور (تھرسڈے ٹائمز) — مولانا فضل الرحمٰن نے کہا ہے کہ خیبرپختونخوا میں ہمارا ووٹ اور مینڈیٹ چوری کر کے پاکستان تحریکِ انصاف (پی ٹی آئی) کو دیا گیا، ہمارے صوبہ میں جس جرنیل نے ہمارا مینڈیٹ چوری کیا ہمیں اس کا نام معلوم ہے، علی امین گنڈا پور کے کسی بیان کو اس قابل نہیں سمجھتا کہ اس کا جواب دوں، اگر آپ طاقت کا مظاہرہ کرنا چاہتا ہے تو اپنے صوبے میں کریں، وزیرِ اعلٰی خیبرپختونخوا کا لب و لہجہ بچگانہ اور غلط ہے۔
جمعیت علمائے اسلام (ف) کے انٹرا پارٹی انتخابات میں آئندہ 5 سالوں کیلئے بلامقابلہ جماعت کا امیر منتخب ہونے کے بعد پشاور میں میڈیا کے نمائندوں سے گفتگو کرتے ہوئے مولانا فضل الرحمٰن نے کہا کہ جمعیت علمائے اسلام (ف) ہر 5 سال کے بعد پورے ملک میں عوامی سطح پر رکن سازی کرتی ہے، ہم نے تھوڑی تعداد میں ہونے کے باوجود بتا دیا ہے کہ ہمیں ہلکا نہ لیا کرو، ہماری اعصاب مضبوط ہیں۔
مولانا فضل الرحمٰن نے مشرقِ وسطیٰ اور اسرائیل کے بارے میں بات کرتے ہوئے کہا کہ عرب ممالک کو یہ سمجھنا ہو گا کہ اسرائیل عرب دنیا اور خلیج تک اپنی جنگ کو وسعت دینا چاہتا ہے، اب مسئلہ صرف فلسطینیوں کا نہیں رہا، اب اگر عرب دنیا خاموش رہتی ہے اور عملی طور پر ایک مشترکہ دفاعی نظام نہیں بناتی تو یہ آگ پوری عرب دنیا کو اپنی لپیٹ میں لے سکتی ہے، اس کیلئے سب کو الرٹ ہو کر باہمی رابطوں کی طرف جانا چاہیے۔
مولانا فضل الرحمٰن نے اسرائیل کے خلاف اسلامی ممالک کے مشترکہ دفاعی نظام کی ضرورت پر زور دیتے ہوئے کہا کہ اس کی قیادت پاکستان، سعودی عرب، ملائیشیا، انڈونیشیا اور مصر کو کرنی چاہیے کیونکہ یہ ممالک اس پوزیشن میں ہیں کہ اگر ان کا گروپ بن جائے اور یہ اسلامی دنیا کو اکٹھا کر سکتے ہیں اور ہم ایک کمانڈ کے تحت اسلامی دنیا اور عرب دنیا کا دفاع کر سکتے ہیں، اس کیلئے اب ہم سب کو ایک ہونا ہو گا، یہ جہاد مسجد الاقصٰی کی آزادی تک جاری رہے گا۔
قائدِ جمعیت مولانا فضل الرحمٰن کا کہنا تھا کہ خیبرپختونخوا میں جمعیت علمائے اسلام (ف) کا ووٹ اور مینڈیٹ چوری کر کے پاکستان تحریکِ انصاف (پی ٹی آئی) کو دیا گیا، ہم نے واضح کر دیا ہے کہ تم ہزار دھاندلی کر کے ہمارے مینڈیٹ کو چراؤ لیکن ہم عوام کے اندر ہیں اور ہم نے تھوڑی تعداد میں ہونے کے باوجود بتا دیا ہے کہ ہمیں ہلکا نہ لیا کرو، ہماری اعصاب مضبوط ہیں اور آئندہ بھی رہیں گے، اگر دھاندلی کی گئی تو ہم پھر میدان میں ہوں گے۔
انہوں نے کہا کہ ہمارے صوبہ میں جس جرنیل نے ہمارا مینڈیٹ چوری کر کے پاکستان تحریکِ انصاف (پی ٹی آئی) کو دیا ہے اور جس نے بلوچستان میں ہلڑ بازی کی پے ہمیں ان کے نام معلوم ہیں، اسٹیبلشمنٹ کو معلوم ہونا چاہیے کہ جس طرح 2018 میں ہمارے حوصلے بلند تھے اسی طرح 2024 میں بھی بلند ہیں اور ہم نے چاروں صوبوں میں ملین مارچ کر کے بتا دیا ہے کہ ہمارا کارکن زندہ ہے اور وہ اپنے ساتھ ناانصافی کو کسی صورت برداشت کرنے کو تیار نہیں ہے۔
جمعیت علمائے اسلام (ف) کے سربراہ کا کہنا تھا کہ یہ پارلیمنٹ اتنی بڑی آئینی ترمیم کی حقدار ہی نہیں ہے، اس پارلیمنٹ کا یہ مینڈیٹ نہیں کہ وہ اتنا بڑا کام کر سکے، ہم سمجھتے ہیں کہ الیکشن ہوں، حقیقی طور پر عوام کے صحیح نمائندے عوام میں آئیں، پارلیمنٹ پر عوام کا اعتماد ہونا چاہیے، اس جعلی قسم کی پارلیمنٹ سے اتنی بڑی آئینی ترمیم کرانا بذاتِ خود ایک ناانصافی ہے، ہم پارلیمانی کردار بھی جاری رکھیں گے۔
آئینی ترمیم کے بارے میں بات کرتے ہوئے مولانا فضل الرحمٰن نے کہا کہ ہم نے پارلیمنٹ میں کچھ تجاویز ضرور دی ہیں اور ان سے کہا ہے کہ آپ شخصیات کے بیچ پھنس گئے ہیں کہ ہمیں یہ جج قبول ہے اور یہ جج قبول نہیں، ججز کی مدت ملازمت میں اضافہ کرنا چاہیے، ان کی تعداد میں اضافہ کرنا چاہیے، یہ تو پھر آپ سیاسی مقاصد کیلئے اتنی بڑی ترمیم کی طرف جا رہے ہیں، آئینی ترمیم میں کسی پارٹی کے کوئی سیاسی مقاصد نہیں ہونے چاہئیں۔
مولانا فضل الرحمٰن کا کہنا تھا کہ عدلیہ میں اصلاحات لائیں اور ایک آئینی عدالت کی طرف جائیں جو 2006 کی میثاقِ جمہوریت کا حصہ ہے لیکن اگر آپ آئینی ترمیم میں بنیادی حقوق کو بھی ڈبو دیتے ہیں اور فوج کو اتنا مضبوط کرتے ہیں کہ ہر سطح پر فوج ہی فوج نظر آئے تو پھر مارشل لاء اور اس ترمیم میں کیا فرق ہے؟ یہ آپ دوسرے معنوں میں مارشل لاء لگا رہے تھے اس لیے ہم نے آئینی ترمیم کو سپورٹ نہیں کیا اور وہ اجلاس نہیں ہو سکا، پی ٹی آئی کے ساتھ بات ہوئی ہے، وہ بھی ایک مسودہ بنا رہے ہیں اور ہم بھی، ایک دوسرے کے ساتھ اسے شیئر کریں گے، اس طریقے سے ہم چاہیں گے کہ ایک اتفاقِ رائے سے ترمیم لائی جائے تاکہ یہ ملک میں کسی ہنگامے کے بجائے واقعی اصلاحات کا ذریعہ بنے۔
قائدِ جمعیت علمائے اسلام (ف) نے کہا کہ ہمارے ساتھ مسودات شیئر ہوئے اور انہیں دیکھنے کے بعد ہی ہم نے انہیں مسترد کیا کہ یہ قابلِ قبول نہیں، ہم چاہتے ہیں کہ ترمیم ایسی لائیں جس سے عوام کو ریلیف ملے اور جمہوریت مستحکم ہو لیکن پارلیمنٹ ہی ایسی نصیب ہوئی ہے جسے ہم عوام کا مینڈیٹ نہیں سمجھتے۔
خیبرپختونخوا کے حالات کے بارے میں بات کرتے ہوئے انہوں نے کہا کہ فی الوقت ہمارا صوبہ آگ میں جل رہا ہے، جنوبی وزیرستان کے وزیر اور محسود قبیلے کے وفود میرے پاس آئے، شمالی وزیرستان کے اتمان زئی قبیلے کے لوگ میرے پاس آئے، کرم ایجنسی کے لوگ بھی آئے اور بتایا کہ اب بھی وہاں لوگ ایک دوسرے کو قتل کر رہے ہیں اور ریاست خاموش ہے، خیبر ایجنسی سے آفریدی قبیلے کے لوگ آئے، کوئی ایسی ایجنسی نہیں ہے جن کے وفود میرے پاس براہِ راست نہ آئے ہوں، یہ سب لوگ تشویش کا شکار ہیں۔
مولانا فضل الرحمٰن نے کہا کہ میرے خیال میں ہمارے قبائل انضمام سے پہلے کی حالت میں اچھے تھے، انضمام کے بعد زیادہ پریشان ہیں، اب نہ فاٹا رہا نہ سیٹل رہا، اس وقت فاٹا کے عوام مظلوم ہیں اور یہی صورتحال بلوچستان کی ہے، ان کے لوگ لاپتہ ہیں اور ہمارے بھی، بدامنی کی صورتحال ہے، مسلح گروہ ہر جگہ آزاد ہیں اور کنٹرول نہیں ہے، ریاست کی رٹ ختم ہو چکی ہے، حکومت کو اس بارے میں سوچنا چاہیے کہ اس کی ترجیحات کیا ہیں۔
مولانا فضل الرحمٰن نے وزیرِ اعلٰی خیبرپختونخوا علی امین گنڈا پور کو آڑے ہاتھوں لیتے ہوئے کہا کہ میں تو علی امین گنڈا پور کے کسی بیان کو اس قابل بھی نہیں سمجھتا کہ اس کا جواب دوں، میں ایسے لوگوں اور ان کے بیانات کا جواب دینا اپنی توہین سمجھتا ہوں، میرے نزدیک علی امین گنڈا پور کے انقلابی بیانات کی کوئی حیثیت نہیں، ایسے بیان دینے کی کیا ضرورت ہے کہ جس سے آپ ریاست اور صوبوں کے درمیان جنگ کی کیفیت پیدا کر دیں؟
مولانا فضل الرحمٰن نے کہا کہ اگر علی امین گنڈا پور طاقت کا مظاہرہ کرنا چاہتا ہے تو اپنے صوبے میں کرے لیکن اگر دوسرے صوبے میں آپ ایسا کرنا چاہتے ہیں اور حکومت آپ کو اجازت نہیں دے رہی تو پھر آپ صوبے اور حکومت تصادم کا حصہ کیوں بنانا چاہتے ہیں؟ پارٹی موجود ہے، اسے حق حاصل ہے وہ یہاں جلسے اور احتجاج کرے، میں ذاتی طور پر جلسے کو روکنے کو غیرجمہوری عمل سمجھتا ہوں، پی ٹی آئی کو جلسے کی اجازت ملنی چاہیے لیکن ایک صوبے کے وزیرِ اعلٰی (علی امین گنڈا پور) کا بیان بھی پاکستان کے لیے بہتر نہیں، یہ بچگانہ عمل اور ناتجربہ کاری ہے، آپ مرکز کے ساتھ اختلافِ رائے کریں اس میں کوئی مسئلہ نہیں لیکن یہ لب و لہجہ غلط ہے۔
