اسلام آباد (تھرسڈے ٹائمز) — وزیراعظم شہباز شریف نے سعودی عرب کے خلاف حوثی باغیوں کے حملوں کی شدید مذمت کرتے ہوئے کہا ہے کہ پاکستان مملکتِ سعودی عرب کی خودمختاری، سلامتی اور علاقائی سالمیت کیلئے اُس کے شانہ بشانہ کھڑا رہے گا۔
پاکستان میں مملکتِ سعودی عرب کے نئے سفیر ڈاکٹر راجح بن طامی البقمی نے وزیراعظم شہباز شریف سے ملاقات کی، جہاں وزیراعظم نے پاکستان آمد پر نئے سفیر کا خیر مقدم کیا اور نئی ذمہ داریاں سنبھالنے پر مبارکباد دیتے ہوئے اُن کی کامیابی کیلئے نیک خواہشات کا اظہار کیا۔
وزیراعظم شہباز شریف نے حالیہ برسوں میں پاکستان اور سعودی عرب کے تعلقات میں نمایاں پیش رفت کا ذکر کرتے ہوئے مختلف شعبوں میں دوطرفہ تعاون کو مزید گہرا اور وسیع کرنے کیلئے پاکستان کے عزم کا اعادہ کیا۔
وزیراعظم شہباز شریف نے مملکتِ سعودی عرب کے خلاف حوثی باغیوں کے حملوں میں حالیہ اضافے کی شدید مذمت کی، جس کے نتیجے میں قیمتی جانیں ضائع ہوئیں اور پاکستانی شہریوں سمیت متعدد بےگناہ افراد زخمی ہوئے۔ اُنہوں نے زور دیا کہ پاکستان اور سعودی عرب ہمیشہ ایک دوسرے کے شانہ بشانہ کھڑے رہے ہیں۔
شہباز شریف نے سٹریٹیجک باہمی دفاعی معاہدے اور مکہ مشترکہ دفاعی اتحاد کو دونوں ممالک کے دیرینہ برادرانہ تعلقات میں تاریخی سنگِ میل قرار دیتے ہوئے کہا کہ یہ علاقائی امن و سلامتی کیلئے دونوں ممالک کے مشترکہ عزم کی عکاسی کرتے ہیں۔
وزیراعظم نے اِس عزم کا بھی اعادہ کیا کہ پاکستان مملکتِ سعودی عرب کی خودمختاری، سلامتی اور علاقائی سالمیت کے تحفظ کیلئے اُس کے شانہ بشانہ کھڑا ہے۔
