کوہاٹ (تھرسڈے ٹائمز) — پولیس حکام اور ابتدائی اطلاعات کے مطابق بدھ کو خیبر پختونخوا کے ضلع کوہاٹ میں دہشت گردوں کے پولیس پر حملے میں ڈی ایس پی حیدر زمان سمیت کم از کم 10 پولیس اہلکار شہید ہو گئے۔ سکیورٹی فورسز نے آپریشن شروع کر دیا ہے اور فائرنگ کا تبادلہ جاری تھا۔
ابتدائی اطلاعات کے مطابق پولیس گمبٹ، دڑابو کچ اور جالندھر بانڈہ کے علاقوں میں پلیسر گولڈ کی غیر قانونی کان کنی کے خلاف کارروائی کے لیے گئی تھی جب اس پر شدید فائرنگ کی گئی۔ ایک ایس ایچ او سمیت مزید تین پولیس اہلکار شدید زخمی ہوئے۔ حملہ آوروں نے پولیس کی پانچ گاڑیوں کو آگ لگا دی۔
حکام کے مطابق حملہ آوروں کو گھیرنے کے لیے اضافی نفری بھیجی گئی ہے اور سکیورٹی فورسز نے علاقے کو گھیرے میں لے لیا ہے۔ ریسکیو 1122 کی ٹیمیں جائے وقوعہ پر روانہ کی گئیں۔
تازہ ترین صورتحال
ابتدائی اطلاعات میں شہدا کی تعداد مختلف بتائی گئی، اور حکام نے حتمی تعداد نہیں بتائی اور نہ ہی تمام شہید اور زخمی اہلکاروں کے نام جاری کیے۔ اس خبر کو اپ ڈیٹ کیا جائے گا۔
