اسٹاربیس، ٹیکساس (دی تھرسڈے ٹائمز) — اسپیس ایکس کی اپنے اسٹارشپ راکٹ کے دونوں حصوں کو پکڑنے کی پہلی کوشش جمعے کو اس وقت ادھوری رہ گئی جب سپر ہیوی بوسٹر کو لانچ ٹاور سے دور موڑ دیا گیا اور وہ خلیجِ میکسیکو کے اوپر پھٹ گیا، تاہم خلائی جہاز اپنا سفر جاری رکھتے ہوئے مدار میں پہنچ گیا۔
اب تک بنائے گئے سب سے اونچے اور طاقتور، 124 میٹر بلند راکٹ نے اپنی 15ویں آزمائشی پرواز کے لیے جنوبی ٹیکساس میں اسپیس ایکس کے اسٹاربیس سے مقامی وقت کے مطابق شام 4 بج کر 45 منٹ (22:45 جی ایم ٹی) پر اڑان بھری۔ بوسٹر کو تقریباً ساڑھے چھ منٹ بعد واپس آنا تھا، جہاں ٹاور کے میکانکی بازو، جنہیں اسپیس ایکس ”چاپ اسٹکس“ کہتی ہے، اسے ہوا میں ہی پکڑ لیتے۔
اس کے بجائے خودکار طور پر مشن روکے جانے کے بعد وہ سمندر میں ایک مقررہ علاقے کی طرف مڑ گیا اور پانی کے عین اوپر پھٹ گیا۔ اسپیس ایکس کے ڈین ہیوٹ نے کہا: ”ابھی یقین سے نہیں کہہ سکتے کہ ہم اسے واپس کیوں نہیں لا سکے۔“
کمپنی کے ایک ترجمان نے نشریات کے دوران کہا: ”حفاظت ہمیشہ ہماری اولین ترجیح ہے، اور ہم ابھی بھی ان گاڑیوں پر ایسی چیزیں آزما رہے ہیں جو ہم نے پہلے کبھی نہیں کیں۔“
بالائی حصے، جسے ”شپ“ کہا جاتا ہے، نے آگے جا کر اسٹار لنک کے 26 انٹرنیٹ سیٹلائٹ چھوڑے۔ اسے اڑان کے تقریباً ساڑھے 22 گھنٹے بعد، ہفتے کو مقامی وقت کے مطابق سہ پہر تقریباً 3 بج کر 15 منٹ (21:15 جی ایم ٹی)، یعنی پاکستان میں اتوار کی رات 2 بج کر 15 منٹ پر لانچ ٹاور کی طرف واپس آنا ہے۔ اسپیس ایکس کا کہنا ہے کہ وہ شپ کو پکڑنے کی کوشش خلا میں اس کا جائزہ لینے کے بعد ہی کرے گی، اور کوئی مسئلہ نظر آنے پر اسے سمندر میں اتارا جا سکتا ہے۔
کامیابی کی صورت میں یہ پہلا موقع ہوگا۔ اسپیس ایکس اس سے پہلے تین پروازوں میں بوسٹر پکڑ چکی ہے، لیکن چاند اور مریخ کے مشنز کے لیے بنائے گئے 72 میٹر لمبے جدید ورژن کے ساتھ یہ اس کی پہلی کوشش تھی۔ پچھلے تمام 14 اسٹارشپس کے بالائی حصے، کبھی منصوبے کے مطابق اور کبھی ناکامی کے باعث، سمندر میں ہی گرے۔ شپ پہلی بار ستمبر میں مدار تک پہنچا تھا۔
دونوں حصوں کو واپس حاصل کرنا ایلون مسک کے اس منصوبے کا مرکزی نکتہ ہے جس کے تحت ایک ہی راکٹ کو بار بار اڑا کر خلائی سفر کی لاگت کم کی جائے۔ اسپیس ایکس کا نسبتاً چھوٹا فالکن 9 راکٹ اب سال میں 100 سے زیادہ بار پرواز کرتا ہے، جس کی بڑی وجہ یہ ہے کہ اس کا پہلا حصہ زمین پر اتر کر دوبارہ استعمال ہوتا ہے، لیکن اس کا دوسرا حصہ اب بھی ضائع ہو جاتا ہے۔
برطانیہ کی رائل ایروناٹیکل سوسائٹی کے صدر میلکم میکڈونلڈ نے کہا: ”مکمل طور پر دوبارہ استعمال کی صلاحیت خلا تک رسائی کی معاشیات کو بنیادی طور پر بدلنے کی صلاحیت رکھتی ہے۔ ایک کامیاب پرواز اس ماڈل کو ثابت نہیں کرے گی۔“
مسک کہہ چکے ہیں کہ انہیں توقع ہے کہ 2027 کے اوائل تک اسٹارشپ ہر ہفتے پرواز کرے گا، اور کمپنی چند ماہ میں فلوریڈا سے لانچ شروع کرنے کا ارادہ رکھتی ہے۔ اسپیس ایکس اس پروگرام پر کم از کم 15 ارب ڈالر لگا چکی ہے، جبکہ ناسا سے بھی اسے اربوں ڈالر مل چکے ہیں۔
یہ پروازیں ناسا کے نظام الاوقات کے لیے اہم ہیں۔ اسپیس ایکس شپ کو ایک لینڈر میں تبدیل کر رہی ہے جس کا مقصد 2028 تک خلابازوں کو چاند پر اتارنا ہے، اور ناسا نے جیف بیزوس کی کمپنی بلیو اوریجن کو بھی ایک حریف لینڈر بنانے کے لیے منتخب کیا ہے۔ اس ماہ کے آغاز میں ناسا نے چاند پر لینڈر کے 10 ارب ڈالر تک کے معاہدوں کے لیے آٹھ کمپنیوں کا انتخاب کیا، جبکہ بلیو اوریجن کے نیو گلین راکٹ کی اگلی لانچ 2027 تک مؤخر ہو گئی ہے۔
