اسلام آباد (تھرسڈے ٹائمز) — پاکستان اسٹاک مارکیٹ میں تیزی کا رجحان برقرار ہے، اور بینچ مارک ہنڈرڈ انڈیکس نے 95 ہزار پوائنٹس کی تاریخی حد کو عبور کر لیا ہے۔
کاروباری ہفتہ کے آخری روز پاکستان اسٹاک مارکیٹ میں مسلسل اضافہ دیکھنے میں آیا ہے، جس میں بینچ مارک ہنڈرڈ انڈیکس 800 پوائنٹس سے زائد کے اضافے کے ساتھ 95 ہزار پوائنٹس تک پہنچ گیا ہے۔ یہ نمایاں تبدیلی 0.82 فیصد اضافے کو ظاہر کرتی ہے۔ دن کے دوران انڈیکس کی بلند ترین سطح 95,204 پوائنٹس رہی جبکہ کم ترین سطح 94,431.18 پوائنٹس پر ریکارڈ کی گئی۔ اس روز تقریباً 127,962,315 حصص کا کاروبار ہوا، جس کی کل مالی قدر 7,005,823,985 روپے رہی۔
پاکستان اسٹاک مارکیٹ کے اس تاریخی اضافے سے ظاہر ہوتا ہے کہ سرمایہ کاروں کا اعتماد ملکی معیشت اور معاشی پالیسیوں پر بڑھ رہا ہے، اور یہ رجحان نہ صرف مارکیٹ میں استحکام کی علامت ہے بلکہ ملکی معیشت کے لیے بھی ایک مثبت پیغام ہے۔
