پشاور (تھرسڈے ٹائمز) — آرمی چیف جنرل عاصم منیر نے کہا ہے کہ قربانیاں مسلح افواج اور قانون نافذ کرنے والے اداروں کی قومی لچک اور متاثر کن و غیر متزلزل لگن کی بنیاد ہیں، دشمن عناصر کے مذموم عزائم کو ناکام بنانا ہماری اولین ترجیح ہے، بر وقت اور مضبوط آپریشنز کے ذریعہ پاک فوج قانون نافذ کرنے والے اداروں کے ساتھ مل کر دیرپا استحکام اور سلامتی کو یقینی بنانے کیلئے امن کے دشمنوں کا انتھک شکار کرے گی۔
پاک فوج کے شعبہ تعلقاتِ عامہ (آئی ایس پی آر) کے مطابق آرمی چیف جنرل عاصم منیر نے پشاور کا دورہ کیا ہے جہاں انہیں موجودہ سیکیورٹی صورتحال اور خطہ میں جاری انسدادِ دہشتگردی آپریشنز کی پیش رفت پر جامع بریفنگ دی گئی ہے جبکہ اس موقع پر وزیرِ اعلیٰ خیبرپختونخوا علی امین گنڈا پور اور فیلڈ کمانڈرز بھی موجود تھے، آرمی چیف جنرل عاصم منیر نے شہداء اور غازیوں کو خراجِ تحسین پیش کیا۔
اس موقع پر جنرل عاصم منیر نے مادرِ وطن کے دفاع کیلئے دی جانے والی بےمثال قربانیوں پر زور دیتے ہوئے کہا ہے کہ یہ قربانیاں مسلح افواج اور قانون نافذ کرنے والے اداروں کی قومی لچک اور متاثر کن و غیر متزلزل لگن کی بنیاد ہیں۔
آرمی چیف جنرل عاصم منیر نے ملک دشمن نیٹ ورکس کے خاتمہ اور قومی سلامتی کو نقصان پہنچانے والے عناصر کو ختم کرنے کے عزم کا اعادہ بھی کیا ہے، آرمی چیف جنرل عاصم منیر نے ہر قسم کے خطرات کا مؤثر طریقے سے مقابلہ کرنے کیلئے فوجیوں کے بلند حوصلے، آپریشنل تیاری اور غیرمتزلزل عزم کو سراہا ہے۔
پاک فوج کے سربراہ جنرل عاصم منیر نے قومی سلامتی کو نقصان پہنچانے والے غیر قانونی سپیکٹرم کو ختم کرنے کیلئے فوج کے پختہ عزم کا اعادہ بھی کیا، آرمی چیف نے دہشتگردی سے نمٹنے کیلئے قوم اور اس کی سیکیورٹی فورسز کے اجتماعی عزم کو اجاگر کرتے ہوئے کہا کہ دشمن عناصر کے مذموم عزائم کو ناکام بنانا ہماری اولین ترجیح ہے۔
آرمی چیف جنرل عاصم منیر کا کہنا تھا کہ بر وقت اور مضبوط آپریشنز کے ذریعہ پاک فوج قانون نافذ کرنے والے اداروں کے ساتھ مل کر دیرپا استحکام اور سلامتی کو یقینی بنانے کیلئے امن کے دشمنوں کا انتھک شکار کرے گی۔
