راولپنڈی—فوج کے شعبہ تعلقاتِ عامہ کے مطابق جنرل ہیڈ کوارٹرز میں آرمی چیف جنرل عاصم منیر کی زیرِ صدارت فارمیشن کمانڈرز کانفرنس ہوئی جس میں تمام فارمیشن کمانڈرز کے علاوہ کور کمانڈرز اور پرنسپل سٹاف آفیسرز نے بھی شرکت کی۔
فارمیشن کمانڈرز کانفرنس سے خطاب کرتے ہوئے آرمی چیف نے کہا کہ ریاست اور مسلح افواج شہداء اور ان کی فیملیز کو احترام کی نگاہ سے دیکھتے ہیں، شہداء کی لازوال قربانیوں کا ہمیشہ احترام کرتے رہیں گے اور قوم کے بھرپور تعاون سے ملک دشمن عناصر کے ناپاک عزائم کو ناکام بنائیں گے۔ معاشرتی انتشار پیدا کرنے اور انسانی حقوق کی خلاف ورزیوں کے بےبنیاد الزامات کے پیچھے چھپنے کی تمام کوششیں ناکام ہوں گی کیونکہ کثرت سے جمع کیے گئے ناقابلِ تردید شواہد کو جھٹلایا نہیں جا سکتا۔
آرمی چیف نے کہا کہ دشمن قوتیں جعلی خبروں سے انتشار پیدا کرنے کی کوششیں کر رہی ہیں لیکن عوام اور مسلح افواج کا آپس میں ایک گہرا تعلق ہے اور 25 مئی کی تقریبات میں عوام کی بھرپور شرکت اس تعلق کی عکاسی کرتی ہے جو قومی سلامتی کیلئے مرکزی حیثیت رکھتا ہے۔ انسانی حقوق کی خلاف ورزیوں اور سیاسی سرگرمیوں میں رکاوٹ ڈالنے کے بےبنیاد الزامات کا مقصد مذموم سیاسی مفادات کے حصول کیلئے عوام کو گمراہ کرنے اور فوج کو بدنام کرنے کی کوشش ہے اور ایسی ہر کوشش ناکام پو گی۔
اجلاس کے شرکاء نے یومِ سیاہ یعنی سانحہ 9 مئی کے پرتشدد واقعات کی بھرپور مذمت کرتے ہوئے کہا کہ اب وقت آ گیا ہے کہ ان حملوں کے منصوبہ سازوں اور ماسٹر مائنڈز کے خلاف قانون کی گرفت کو مزید مضبوط کیا جائے۔ شرکاء نے مسلح اَفواج، قانون نافذ کرنے والے اِداروں کے اہلکاروں و افسران اور سول سوسائٹی کے شہداء سمیت تمام شہداء کو خراجِ عقیدت پیش کیا۔
فارمیشن کمانڈرز کانفرنس کے شرکاء کا کہنا تھا کہ فوج ملکی سلامتی اور استحکام کیلئے کسی بھی قربانی سے دریغ نہیں کرے گی جبکہ شہداء کی یادگاروں، جناح ہاؤس اور فوجی تنصیبات پر حملہ کرنے والوں کے خلاف آئینِ پاکستان کے مطابق آرمی ایکٹ اور آفیشل سیکرٹ ایکٹ کے تحت کارروائی کرتے ہوئے انہیں کیفرِ کردار تک پہنچایا جائے گا۔ دشمن قوتوں کے ناپاک عزائم کو مکمل طور پر ناکام بنانے کیلئے تمام رکاوٹوں اور ابہام پیدا کرنے کی کوششوں کے خلاف آہنی ہاتھوں سے نمٹا جائے گا۔
