پشاور (تھرسڈے ٹائمز) —آرمی چیف جنرل عاصم منیر نے پہلی بار منعقد ہونے والی “قومی ورکشاپ خیبرپختونخوا” کے شرکاء سے خطاب کرتے ہوئے کہا ہے کہ پاکستان میں غیر قانونی طور پر مقیم غیر ملکی پاکستان کی سلامتی اور معیشت کو بری طرح متاثر کر رہے ہیں، انہیں باعزت طریقہ سے ان کے ملکوں میں واپس بھیجا جا رہا ہے۔
انٹر سروسز پبلک ریلیشنز (ائی ایس پی آر) کے مطابق پاک فوج کے سربراہ جنرل عاصم منیر نے آج پشاور کا دورہ کیا ہے جہاں کور کمانڈر پشاور نے ان کا استقبال کیا، آرمی چیف نے انسدادِ دہشتگردی کی مختلف کارروائیوں میں بہادری کا مظاہرہ کرنے والے فوجی افسران اور جوانوں سے بھی ملاقات کی اور ان کی کارکردگی کو سراہا۔
اس موقع پر آرمی چیف جنرل عاصم منیر کو سیکیورٹی کی مجموعی صورتحال، انسدادِ دہشتگردی کی کارروائیوں اور غیر قانونی طور پر مقیم غیر ملکیوں کی ان کے وطن واپسی سمیت نئے ضم شدہ اضلاع میں سماجی و اقتصادی ترقی کی پیش رفت پر بھی بریفننگ دی گئی۔
آرمی چیف جنرل عاصم منیر نے کہا ہے کہ قوم کو مسلح افواج کی شاندار کارکردگی پر فخر ہے، پاک فوج خون کے آخری قطرے تک مادرِ وطن کی حفاظت کا فریضہ ادا کرتی رہے گی، کامیابی پاکستان کا مقدر ہے، جامع حکمتِ عملی سے دشمن قوتوں کے مذموم عزائم کو ناکام بنایا جا رہا ہے۔
پاک فوج کے سربراہ کا کہنا تھا کہ حکومت نے غیر قانونی طور پر مقیم غیر ملکیوں کی واپسی کا فیصلہ پاکستان کے وسیع تر مفاد میں کیا ہے، غیر قانونی طور پر پاکستان میں مقیم غیر ملکی پاکستان کی سلامتی اور معیشت کو بری طرح متاثر کر رہے ہیں، انہیں باعزت طریقے سے ان کے ملکوں میں واپس بھیجا جا رہا ہے۔
