میئن (تھرسڈے ٹائمز) — سابق امریکی صدر ڈونلڈ ٹرمپ کو امریکی ریاست ”میئن“ کی جانب سے صدارتی انتخابات میں حصہ لینے کیلئے نااہل قرار دے دیا گیا ہے۔
امریکی ریاست ”میئن“ کی سیکرٹری آف سٹیٹ ”شینا لی بیلوز“ نے یہ نتیجہ اخذ کیا ہے کہ ڈونلڈ ٹرمپ نے الیکشن 2020 میں ووٹرز سے متعلق دھوکہ دہی کے جھوٹے دعوے پھیلانے اور پھر قانون سازوں کو ووٹوں کی تصدیق سے روکنے کیلئے اپنے حامیوں کو کیپیٹل ہل کی جانب مارچ پر اکسایا۔
شینا لی بیلوز نے 34 صفحات پر مشتمل فیصلے میں لکھا ہے کہ امریکی آئین ہماری حکومت کی بنیادوں پر حملے کو برداشت نہیں کرتا۔ اس فیصلے کو ریاست کے سپیرئیر کورٹ میں چیلنج کیا جا سکتا ہے جبکہ ”شینا لی بیلوز“ نے کورٹ کی جانب سے عدالتی رولنگ تک اپنا فیصلہ معطل کر دیا ہے۔
ریپبلکن کی صدارتی نامزدگی کیلئے فرنٹ رنر ڈونلڈ ٹرمپ کی کمپیئن کی جانب سے اس فیصلے کو ”ظالمانہ“ قرار دیتے ہوئے کہا گیا ہے کہ اس کے خلاف فوری طور پر اعتراض دائر کیا جائے گا، ٹرمپ کے وکلاء نے یہ مؤقف اختیار کیا ہے کہ ٹرمپ بغاوت میں ملوث نہیں تھے اور 2021 میں فسادات کے دن اپنے حامیوں کیلئے ڈونلڈ ٹرمپ کے ریمارکس ان کی آزادیِ اظہارِ رائے کے حق کے تحت محفوظ تھے۔
یہ فیصلہ ”میئن“ کے سابق قانون سازوں کے ایک گروپ کی جانب سے اس مؤقف کے اظہار کے بعد سامنے آیا ہے کہ ڈونلڈ ٹرمپ کو امریکی آئین کی ایک شق کی بنیاد پر نااہل قرار دیا جانا چاہیے جو ایسے افراد کو عہدہ سنبھالنے سے روکتی ہے جو امریکہ میں پہلے سے حلف اٹھانے کے بعد بغاوت یا غداری میں ملوث رہے ہوں۔
سابق قانون سازوں کمبرلے روزن، تھامس سیویلو اور ایتھن اسٹرملنگ نے ایک بیان میں کہا ہے کہ سابق صدر ڈونلڈ ٹرمپ کو ”میئن“ میں ووٹنگ سے روکنے کے اپنے فیصلے میں ”شینا لی بیلوز“ جمہوریت اور ہمارے آئین کے ساتھ کھڑی ہوئی ہیں۔
یہ فیصلہ صرف ”میئن“ کے مارچ میں منعقد ہونے والے پرائمری انتخابات پر لاگو ہوتا ہے تاہم یہ نومبر کے عام انتخابات کیلئے ڈونلڈ ٹرمپ کی حیثیت کو متاثر کر سکتا ہے، اس فیصلے سے ممکنہ طور پر امریکی سپریم کورٹ پر 14ویں ترمیم کے سیکشن 3 کی آئینی شق کے تحت ملک بھر میں ٹرمپ کی اہلیت کے بارے میں سوالات کو حل کرنے کیلئے دباؤ میں اضافہ ہو گا۔
ٹرمپ پر 2020 کے انتخابات کو اوور ٹرن کرنے کی کوشش میں ان کے کردار کیلئے وفاقی مقدمے اور جارجیا میں فردِ جرم عائد کی جا چکی ہے لیکن ان پر 6 جنوری کے حملے سے متعلق بغاوت کا الزام نہیں لگایا گیا، وہ ریپبلکن نامزدگی کی دوڑ میں رائے عامہ کے جائزوں کے حوالہ سے ایک بڑے فرق کے ساتھ آگے ہیں۔
کولوراڈو کی اعلٰی عدالت نے 19 دسمبر کو ڈونلڈ ٹرمپ کو ریاستی پرائمری بیلٹ سے نااہل قرار دے دیا تھا جس سے وہ امریکی تاریخ کے پہلے ایسے امیدوار بن گئے جنہیں بغاوت میں ملوث ہونے کی وجہ سے صدارت کیلئے نااہل قرار دیا گیا ہے۔ ڈونلڈ ٹرمپ نے ”کولوراڈو“ کے فیصلے کے خلاف سپریم کورٹ میں اپیل دائر کرنے کا عزم ظاہر کیا اور بیلٹ چیلنجز کو ”غیر جمہوری“ قرار دیتے ہوئے تنقید کا نشانہ بنایا ہے جبکہ کولوراڈو ریپبلکن پارٹی نے بدھ کو سپریم کورٹ میں اپنی اپیل دائر کر دی ہے۔
امریکہ کی دیگر کئی ریاستوں میں ٹرمپ کو نااہل قرار دینے کی اسی طرح کی کوششوں کو مسترد کر دیا گیا ہے، عام انتخابات میں میدانِ جنگ کی ایک اہم ریاست ”مشی گن“ کی اعلٰی عدالت کی جانب سے بدھ کے روز ڈونلڈ ٹرمپ کو ریاست کے صدارتی پرائمری بیلٹ سے نااہل قرار دینے کے مقدمے کی سماعت کرنے سے انکار کر دیا گیا۔
غیر جانبدارانہ انتخابی پیشین گوئی کرنے والوں کی جانب سے ”میئن“ کو ممکنہ طور پر ڈیموکریٹک قرار دیا گیا ہے جس کا مطلب ہے کہ ریاست میں صدر جوبائیڈن کی جیت متوقع ہے لیکن ٹرمپ نے غیر معمولی سیٹ اپ کی وجہ سے 2016 اور پھر 2020 کے انتخابات میں بھی ”میئن“ سے ایک الیکٹورل ووٹ حاصل کیا جو ریاست کو اپنے چار الیکٹورل کالج ووٹوں کو تقسیم کرنے کی اجازت دیتا ہے جبکہ صدارتی جنگ جیتنے کیلئے امیدواروں کو الیکٹورل کالج کے 270 ووٹ حاصل کرنا ہوں گے۔
ایڈوکیسی گروپس اور ڈونلڈ ٹرمپ کے کچھ دیگر مخالف ووٹرز نے 14ویں ترمیم کے سیکشن 3 کے تحت متعدد ریاستوں میں ڈونلڈ ٹرمپ کی اہلیت کو چیلنج کیا ہے، 14ویں ترمیم کو امریکی سول وار کے بعد سابق اتحادیوں کو حکومت میں شامل ہونے سے روکنے کیلئے منظور کیا گیا تھا۔
دیگر ریاستوں کے برعکس ”میئن“ میں انتخابات کی نگرانی کرنے والی ”شینا لی بیلوز“ کیلئے عدالتوں کی طرف سے نااہلی پر غور کرنے سے پہلے اس پر ابتدائی فیصلہ کرنا ضروری تھا۔
کیلیفورنیا کے وزیرِ خارجہ ”شرلی ویبر“ نے جمعرات کو 5 مارچ کے پرائمری انتخابات کیلئے امیدواروں کی مصدقہ فہرست میں ڈونلڈ ٹرمپ کو شامل کیا ہے جس سے یہ ظاہر ہوتا ہے کہ کسی بھی بیلٹ چیلنج کا حل اب عدالتوں پر منحصر ہے۔
