اسلام آباد (تھرسڈے ٹائمز) — پاکستان پیپلز پارٹی کے سابق شریک چیئرمین اور پاکستان پیپلز پارٹی پارلیمنٹیرینز کے سربراہ آصف علی زرداری دوسری بار صدرِ پاکستان منتخب ہو گئے، سنی اتحاد کونسل کے امیدوار محمود خان اچکزئی کو شکست کا سامنا کرنا پڑا۔ آصف زرداری سندھ سے منتخب ہونیوالے مسلسل پانچویں صدر منتخب ہوئے ہیں۔
صدارتی انتخاب 2024 میں حکمراں اتحاد (پاکستان مسلم لیگ (ن)، پاکستان پیپلز پارٹی، متحدہ قومی موومنٹ (پاکستان)، استحکامِ پاکستان پارٹی و دیگر) کے متفقہ طور پر نامزد امیدوار آصف علی زرداری دوسری بار پاکستان کے صدر منتخب ہو گئے ہیں، انہوں نے مجموعی طور پر 411 الیکٹورل ووٹس حاصل کیے ہیں جبکہ ان کے مدمقابل سنی اتحاد کونسل کے نامزد امیدوار محمود خان اچکزئی نے 181 ووٹس حاصل کیے ہیں۔
آصف زرداری کو قومی اسمبلی سے 255 ووٹ ملے جبکہ محمود خان اچکزئی کو 119 ووٹ حاصل ہوئے۔ پنجاب اسمبلی سے آصف زرداری کو 43 ووٹ، سندھ اسمبلی سے 58 ووٹ، بلوچستان اسمبلی سے تمام 47 ووٹ جبکہ خیبرپختونخواہ سے آصف زرداری کو 8 ووٹ حاصل ہوئے۔ انکے مد مقابل محمود خان اچکزئی کو پنجاب اسمبلی سے 18ووٹ، خیبرپختونخواہ اسمبلی سے 41 ووٹ، سندھ اسمبلی سے 3 ووٹ جبکہ وہ بلوچستان اسمبلی سے کوئی ووٹ حاصل نہ کرسکے۔
آصف علی زرداری اس سے قبل ستمبر 2008 سے ستمبر 2013 تک صدرِ پاکستان رہ چکے ہیں، وہ جمہوری طور پر صدرِ پاکستان منتخب ہو کر آئینی مدت مکمل کرنے والے پہلے سیاستدان بنے جبکہ آج انہوں نے جمہوری طور پر دوسری بار صدرِ پاکستان منتخب ہو کر ایک نیا ریکارڈ قائم کر دیا ہے۔
