راولپنڈی (تھرسڈے ٹائمز) — افواجِ پاکستان کے شعبہ تعلقات عامہ آئی ایس پی آر نے ایک اعلامیہ جاری کیا ہے جس میں سانحہ 9 مئی کو قومی تاریخ کا ایک سیاہ دن قرار دیا ہے۔ افواجِ پاکستان نے اعلان کیا ہے کہ اس دن سیاسی محرکات کی بنیاد پر برین واش کیے گئے شرپسندوں نے ریاست کے خلاف بغاوت کی اور جان بوجھ کر تشدد کا سہارا لیا۔ ان شرپسند عناصر نے ریاست کی مقدس علامتوں اور قومی ورثے سے تعلق رکھنے والے مقامات کو نقصان پہنچایا، جس کا مقصد ملک میں خود ساختہ اور تنگ نظر انقلاب لانے کی ناکام کوشش تھی۔
افواجِ پاکستان نے اعلامیے میں کہا ہے کہ مسلح افواج نے انتہائی تحمل کا مظاہرہ کیا اور تخریب کاروں کی گھناؤنی سازش کو ناکام بنا دیا۔ ان شر پسند عناصر کی بنیادی مقصد افراتفری پھیلا کر عوام اور مسلح افواج کے درمیان تصادم کو ہوا دینا تھا، جسے مسلح افواج نے ناکام بنا دیا۔
افواجِ پاکستان نے مزید کہا کہ قومی ہم آہنگی اور استحکام کو نقصان پہنچانے میں ناکام ہونے کے بعد، اس سازش کے منصوبہ سازوں، سہولت کاروں اور کرنے والوں نے مسلح افواج اور ریاست کے خلاف نفرت کی ایک مذموم مہم شروع کی۔ ان شرپسند عناصر نے بیانیے کو توڑ مروڑ کر شرمناک طریقے سے خود کو بری الذمہ قرار دینے اور الزام ریاستی اداروں پر ڈالنے کی بھی کوشش کی۔
اعلامیے کے مطابق افواجِ پاکستان کا کہنا ہے کہ ان ہی وجوہات کی بنا پر 9 مئی کے سانحے کے منصوبہ سازوں، سہولت کاروں اور کرنے والوں کے ساتھ نہ تو کوئی سمجھوتہ ہو سکتا ہے اور نہ ہی انہیں قانون کی دھجیاں اڑانے کی اجازت دی جائے گی۔ 9 مئی کے اصل مجرموں کو انصاف کے کٹہرے میں لانا اس بات کو یقینی بنانا ہے کہ مستقبل میں کوئی بھی ہمارے ہیروز کی یادوں اور ہمارے اتحاد کی علامتوں کی اسی طرح کے غلط طرزِ عمل کے ذریعے بے حرمتی کرنے کی جرأت نہ کرے۔
افواجِ پاکستان کا کہنا ہے کہ آج کے دن پاکستان کی مسلح افواج پاکستان کی خود مختاری اور علاقائی سالمیت کا دفاع کرنے اور پاکستان کے اندرونی اور بیرونی دشمنوں کے مذموم عزائم کو ناکام بنانے کے اپنے عزم کی تجدید کرتی ہے، ہمارے شہداء اور ان کے خاندان پاکستان کا فخر ہیں، پاکستان کی مسلح افواج اپنے وقار اور عزت کو ہر قیمت پر برقرار رکھنے کا عہد کرتی ہیں، پاکستان کی مسلح افواج کا پاکستانی عوام کے ساتھ بہت خاص رشتہ ہے۔
جاری کیے گئے اعلامیے میں افواجِ پاکستان نے عزم کا اظہار کیا کہ پوری قوم آج پاکستان کو کمزور کرنے کی سازشوں کی پُرزور مذمت کرنے اور اپنے پیارے ملک کی خوش حالی اور استحکام کے لیے مل کر کام کرے۔
