راولپنڈی (تھرسڈے ٹائمز) — آرمی چیف جنرل عاصم منیر کی زیرِ صدارت 83ویں فارمیشن کمانڈرز کانفرنس کا انعقاد، شہداء کی قربانیوں کو زبردست خراجِ عقیدت پیش کیا گیا، شہداء کے ایصالِ ثواب کیلئے فاتحہ خوانی بھی کی گئی۔
پاک فوج کے شعبہ تعلقاتِ عامہ (آئی ایس پی آر) کے مطابق راولپنڈی میں آرمی چیف جنرل عاصم منیر کی زیرِ صدارت 83ویں فارمیشن کمانڈرز کانفرنس کا انعقاد ہوا ہے جس میں عسکری قیادت کی جانب سے پاکستان کی حفاظت، سلامتی اور خودمختاری پاک فوج، قانون نافذ کرنے والے اداروں اور پاکستانی شہریوں سمیت تمام شہداء کو زبردست خراجِ عقیدت پیش کیا گیا ہے اور ان کے ایصالِ ثواب کیلئے فاتحہ خوانی کی گئی۔
انٹر سروسز پبلک ریلیشنز کے مطابق فورم کو جیو سٹریٹجک حالات، قومی سلامتی کیلئے اُبھرتے ہوئے چیلنجز اور ملٹی ڈومین خطرات سے نمٹنے کیلئے پاک فوج کی حکمتِ عملی سے متعلق آگاہ کیا گیا جبکہ پاک فوج کو جدید بنانے اور فیلڈ فارمیشنز کیلئے لاجسٹک سپورٹ کو بہتر بنانے کیلئے نئی ٹیکنیکل تخلیقات کے بارے میں بھی شرکاء کو بریفنگ دی گئی۔
فارمیشن کمانڈرز کانفرنس نے افغانستان کی سرحد پار سے مسلسل خلاف ورزیوں اور افغان سرزمین کو استعمال کرتے ہوئے دہشتگردی کی پلاننگ پر سخت تحفظات کا اظہار کرتے ہوئے کہا کہ پاکستان کے دشمن پاکستان کے اندر سیکیورٹی فورسز اور معصوم شہریوں کو نشانہ بنانے کیلئے افغانستان کو استعمال کر رہے ہیں، جبکہ فورم نے دہشت گردی کے خلاف جنگ میں نئے ضم شدہ اضلاع کے عوام کی بیش بہا قربانیوں کا اعتراف کیا جبکہ دہشتگردی کو فیصلہ کن شکست دینے کیلئے نئے ضم شدہ اضلاع کی ترقی کی اہمیت پر بھی زور دیا گیا۔
ترجمان پاک فوج کے مطابق فورم نے بلوچستان میں سماجی و اقتصادی ترقی کی ضرورت پر بھی زور دیا تاکہ بیرونی طور پر پروپیگنڈا کرنے والوں کا مقابلہ کیا جا سکے، کہا گیا کہ پروپیگنڈا کرنے والوں کی پشت پناہی غیر ملکی سپانسرڈ پراکسیز کے ذریعہ کی جاتی ہے تاکہ بلوچستان کے نوجوانوں کو امن اور ترقی سے دور رکھا جا سکے۔
پاک فوج کے شعبہ تعلقاتِ عامہ کی جانب سے جاری کیے گئے بیان کے مطابق فورم نے مشرقی سرحد پر موجودہ صورتحال اور مقبوضہ جموں و کشمیر میں معصوم کشمیریوں کے ماورائے عدالت قتل کے تازہ ترین واقعات کا جائزہ لیا اور اقوامِ متحدہ کی سلامتی کونسل کی قراردادوں کے مطابق حق خودارادیت کیلئے کشمیریوں کی منصفانہ جدوجہد میں مکمل یکجہتی کا اظہار کیا جبکہ بھارت میں سیاسی مقاصد کے حصول کیلئے بڑھتے ہوئے فاشزم پر اقلیتوں بالخصوص مسلمانوں کے ساتھ انسانیت سوز سلوک پر بھی تشویش کا اظہار کیا گیا۔
آرمی چیف جنرل عاصم منیر کی زیرِ صدارت 83ویں فارمیشن کمانڈرز کانفرنس نے فلسطینی عوام کے ساتھ مکمل یکجہتی کا اظہار کرتے ہوئے غزہ میں انسانی حقوق کی سنگین خلاف ورزیوں اور جنگی جرائم کی مذمت کی جبکہ غزہ پٹی کے اندر رفاہ آپریشن اور دیگر تمام آپریشنز کو روکنے کیلئے عالمی عدالت انصاف کے فیصلے کی حمایت کی گئی۔
فارمیشن کمانڈرز کانفرنس کے شرکاء نے زور دیا کہ افواجِ پاکستان سمیت تمام ریاستی اداروں کے خلاف جاری شدہ ڈیجیٹل دہشتگردی مذموم سیاسی مقاصد کے حصول کیلئے بیرونی سہولتکاروں کی مدد کے ساتھ کی جا رہی ہے جس کا مقصد جھوٹ اور پروپیگنڈا کے ذریعہ پاکستانی قوم میں مایوسی پیدا کرنا اور افواجِ پاکستان سمیت قومی اداروں اور عوام کے درمیان خلیج ڈالنا ہے۔
آئی ایس پی آر کے مطابق 83ویں فارمیشن کمانڈرز کانفرنس کے شرکاء نے اس عزم کا اعادہ کیا کہ پاکستانی قوم جھوٹ اور پروپیگنڈا کرنے والوں کے مذموم اور مکروہ عزائم سے پوری طرح باخبر ہے اور اِن ناپاک قوتوں کے مذموم ارادوں کو مکمل اور یقینی شکست دی جائے گی، کانفرنس میں اعادہ کیا گیا کہ ملک کے وسیع تر مفاد میں لازم ہے کہ 9 مئی کے منصوبہ سازوں، مجرموں، اس کی حوصلہ افزائی کرنے والوں اور تمام سہولتکاروں کو انصاف کے کٹہرے میں کھڑا کیا جائے۔
ترجمان پاک فوج کے مطابق کانفرنس میں کہا گیا کہ قانون کی عمل داری کو قائم کرنے اور 9 مئی کے مجرموں کے خلاف فوری اور شفاف عدالتی و قانونی کارروائی کے بغیر ملک ایسے سازشی عناصر کے ہاتھوں ہمیشہ یرغمال رہے گا جبکہ کانفرمس میں پائیدار اقتصادی ترقی اور غیر قانونی سرگرمیوں بشمول اسمگلنگ، ذخیرہ اندوزی، بجلی چوری کو روکنے، ون ڈاکومنٹ رجیم، غیر قانونی غیر ملکی تارکین کی باعزت وطن واپسی سمیت قومی ڈیٹا بیس کی حفاظت کیلئے مختلف شعبوں میں حکومت کے اقدامات کی مکمل حمایت کرنے کا بھی عزم سامنے آیا۔
آرمی چیف جنرل عاصم منیر نے مختلف مشقوں کے دوران فارمیشنز کی اعلٰی و معیار ی تربیت اور انسدادِ دہشتگردی کی کارروائیوں میں افسران اور جوانوں کی شاندار کارکردگی اور فارمیشنز کے بلند حوصلے اور ہمہ وقت آپریشنل تیاریوں کو بھی سراہا جبکہ شرکاء نے حاضر سروس، ریٹائرڈ افسران اور جوانوں کی تربیت، انتظامیہ اور فلاح و بہبود کیلئے فوجی سطح پر کیے جانے والے اقدامات پر مکمل اطمینان کا اظہار کیا۔
پاک فوج کے شعبہ تعلقاتِ عامہ کے مطابق فورم نے یومِ تکبیر پر پاکستان کی طرف سے حاصل کیے گئے اہم سنگِ میل اور خطہ پر اس کے مستحکم اثرات کو سراہا، آرمی چیف جنرل عاصم منیر کی زیرِ صدارت فارمیشن کمانڈرز کانفرنس کا اختتام اس عزم کے ساتھ ہوا کہ ملک کی سلامتی اور استحکام کو درپیش تمام خطرات کو قابلِ فخر قوم کی مکمل حمایت سے ناکام بنایا جائے گا۔
